Jýyrda ǵana asa iri kólemde para aldy degen kúdikpen basshylary ustalǵan "Baıterek Development" Aksıonerlik qoǵamy qazaq tilin mensinbeı otyr. Dálirek aıtsaq, kompanıanyń ınternet saıtynda  aqparattar resmı tilde tap-tuınaqtaı etip  berilgen, al memlekettik tildegi nusqasyndaǵy qateden kóz súrinedi. Bul týraly «Qazaqstan» telearnasynyń jańalyqtar qyzmeti habarlaǵan bolatyn. "Baıterek" holdıńine qarasty Aksıonerlik qoǵamnyń saıtyndaǵy mátinderdi aıtpaǵanda negizgi aıdarlardyń ózi qatege toly. Mysaly «tabý» degen sózdi «tobý» dep aýdarǵan. Sondaı-aq kompanıanyń  baǵyty degen bólimdegi qazaqsha mátinderdiń múlde maǵynasy joq jáne tildik erejeniń eshbirine kelmeıdi.  Mysaly kompanıanyń baǵyty.......... dep kórsetilgen.

Ulttyq qundylyqtarymyzdy mensinbeı otyrǵandardyń ishinde ulttyq holdıńter de bar. Mysaly «Qazagro» men  «Qazagroqarjy» kompanıalarynyń resmı ınternet resýrstarynda nesıe berýge qatysty aqparattar tek orys tilinde. Aýyldardaǵy qazaq tildi sharýalarmen tikeleı jumys isteıtin kompanıalar úshin bul úlken syn ekeni aıtylǵan. Memlekettik tildi mensinbeı otyrǵan taǵy bir kompanıa retinde «Kásipqor» holdıńi de atalǵan. Kompanıa týraly aqparatty qazaq tilinde bilgińiz kelse, orys tilinde oqýǵa májbúr bolasyz delingen beınesújette.

Eń qyzyǵy, prokýratýra mamandarynyń sózinshe Ulttyq kompanıalar men kvazımemlekettik kompanıalardyń resmı saıttarynyń memlekettik tildegi mazmuny eshqandaı zańmen rettelmegen. Til týraly zańda tek memlekettik organdardyń ınternet resýrstary týraly kórsetligen. Degemen materıalda kóterilgen máseleni qalalyq prokýratýra qatań qadaǵalaýǵa alatynyn aıtqan.