Qala ákiminiń eseptik kezdesýinde oblys basshysy Berdibek Saparbaev Aqtóbe oblysynda sońǵy jyldary bolǵan jaǵymsyz jaıttardy tizbektep shyqty, dep habarlaıdy «Tilshi».

«Keıde uıalasyń. Munaıdy qaıda urlaıdy? Aqtóbede! Terakt qaıda bolady? Aqtóbede.  Endi kelip gazdy urlap jatyr. Mynaý uıat qoı! Tap osy gazdy urlaıdy dep oılamadym. Onyń ústine, bul degen áleýmettik gaz ǵoı», — dep keıidi Berdibek Saparbaev.

Oblys basshysy aı saıyn mınıstrlikke kvotany kóbeıtý jóninde «jalynatynyn» da jasyrmady.

«2015 jyly 3,5 myń tonna gazǵa kvota beriletin. Byltyr ony 5,2 myń tonnaǵa kóterdik. Bıyl bul kórsetkish 7 myń tonna jetkizildi. Al ony jigitter shetinen urlap jatyr. Aparyp basqa jaqqa satady. Qazaqta «urlyq úlken kúná, ol eshýaqytta keshirilmeıdi» degen bar. Urlyqpen alysqa barmaısyń», — dedi oblys basshysy.

Onyń aıtýynsha, taıaýda qoldy bolǵan gaz urlaǵandardyń isi quqyq qorǵaý organdarymen bolyp jatyr.

«Men taǵy da qaıtalap aıtamyn. Zańdy buzǵan adam, urlyq jasaǵan adam qatań jazalanady. Oǵan eshýaqytta keshirim bolmaıdy. Meshkeı degen jaqsy at emes», — degen Saparbaev ótken juma kúninen bastap gaz baǵasynyń 43-45 teńgege tómendetilgenin habarlady.

«SNPS-Aqtóbemunaıgaz» kompanıasymen kelistik. «Qazaqoıl-Aqtóbemen» de kelisim bar. Úkimettiń bergen kvotasy bar. Jańajoldan gazdyń bir tekshesin 18 teńgege satyp alamyz. Al bizdiń gaz quıý beketteri qanshadan satyp keledi? Iá, 50 teńgeden! Gaz quıý beketterindegi adamdar eńbek etpeı aqsha tapqylary keledi. 12 saǵattyń ornyna 16 saǵat jumys istep tapsa másele joq. Baqsha ekse másele joq, mal baqsa másele bolmaıdy. Al olar túk istemeı aqsha taýyp keledi», — dedi oblys basshysy.