Hıdjab – arabtardan kelgen tumsha. Olardyń ózi musylman dinin qabyldaǵanǵa deıin hıdjap kıgen. Iaǵnı, hıdjab – olardyń tarıhı ulttyq kıimi. Dalasy – shól, únemi qum borap turatyn bolǵandyqtan, olardyń áıelderi kózderin ǵana qaldyryp, tumshalanyp kıinetin bolǵan. Al, ony biz hıdjab kımegen musylman emes dep, bireýdiń qańsyǵyn tańsyq kórip júrmiz. Qudaı-aý, shashyńdy jaýyp júrgiń kelse, nege kımeshek kımeske. Qazaq áıelderiniń kımeshegine teń keler kıim bar ma?! Ol densaýlyqqa da paıdaly bolǵan. Qazir jádigerge aınalǵan kımeshekti alyp qarańyz… Aldyńǵy óńiri kindikten tómen túsedi jáne birneshe qabat kestelengen. Iaǵnı, omyraýdy jaýyp turady, tóske sýyq ótkizbeıdi. Arty úshburyshtalyp keledi de, tilersekke deıin tógilip turady. Beldi sýyqtan qorǵaıdy. Men jastardyń ortasynda kóp bolamyn. Atanyń amanatyn jastarǵa jetkizgim keledi. Bizdegi hıdjab kıgender - adasqandar. Al, musylmandyqtyń aıǵaǵy – tumshalanǵan hıdjab, qaýǵadaı saqal emes, júrektegi ıman. Balaǵyn keskenderde, saqaly óskenderde emes, Allany júregine qondyrǵanda ǵana ıman bar. Álgindeı pıǵyldaǵylardyń barlyǵy – Islamdy ishten iritýdi, qazaqty qadir-qasıetinen aıyrýdy maqsat etken din­sizderdiń aǵymy. Olar bizdiń salt-dás­tú­rimizdi arabtarda joq deıdi de, bar asy­lymyzdy haram sanaıdy. Mysaly, olar aıtady ákeńe as berme, kelinder sálem salmasyn, ólgen adamdy sol zamatta jerle deıdi. Arabtardyń ólgen adamdy sol zamatta jerleıtini jeri ystyq, máıit shydamaıdy. Al, bizdiń dástúrimizde jan-jaqtaǵy aǵaıyn-týysyn kútetin úrdis bar. Kelip, kóńili sýysyn, bir ýys topyraǵyn salsyn deıdi. Sol arqyly ár adam óziniń de ajaldy ekenin, mynaý ómirdiń jalǵan ekendigin túısinedi.

Zeınep Ahmetova