Búgin «Áziret Sultan» memlekettik tarıhı-mádenı qoryq-mýzeıiniń uıymdastyrýymen «Mýzeıdegi ǵylymı-zertteý jumystarynyń ózekti máseleleri» taqyrybynda «12 – sáýir ǵylymı qyzmetkerler» kúnine oraı dóńgelek ústel bolyp ótti dep habarlaıdy "Qamshy" aqparattyq agenttigi.

Dóńgelek ústel jumysyna «Áziret Sultan» memlekettik tarıhı-mádenı qoryq-mýzeıi qyzmetkerlerimen birge, Qoja Ahmet Iasaýı atyndaǵy Halyqaralyq Qazaq-Túrik ýnıversıteti Arheologıa ǵylymı-zertteý ortalyǵynyń ǵylymı qyzmetkerleri PhD (fılosofıa doktory) Mýzaffar Gýrsoı, Syzdyqov Baqdáýlet, N. Tórequlov mýzeıiniń ǵylymı qyzmetkeri – Nyshanbaeva Roza, S. Erýbaev mýzeıiniń meńgerýshisi – Bostanov Aqsúmbe, ǵylymı qyzmetker – S.Nıetbek qatysyp óz oılaryn ortaǵa saldy.

Alǵashqy sóz kezegin alǵan «Áziret Sultan» memlekettik tarıhı-mádenı qoryq-mýzeıiniń dırektory J.Áýbákir barlyq ǵylym salasynda eńbek etip júrgen qyzmetkerlerdi, ǵylymı qoǵamdy, tól merekelerimen quttyqtap, bıik belesterge jetýge sáttilik pen shyǵarmashylyq tabystar tiledi.

Kelesi kezekte qoryq-murajaıdyń kishi ǵylymı qyzmetkeri A.Orynbekova qoryq-mýzeıdiń ǵylymı-zertteý bóliminiń tarıhy, qurylymy, atqaryp jatqan qyzmetteri, jetken jetistikterin tanystyratyn qysqasha baıandama oqydy.

Dóńgelek ústel barysynda, búgingi mýzeılerde ǵylymı-zertteý jumystarynyń júrgizilý barysy, arheologıalyq qazba jumystaryn júrgizýmen baılanysty keleli oılar, zertteýler júrgizýdiń ádis-tásilderi jáne mýzeıler men urpaq tárbıesin ushtastyrýǵa baılanysty ózekti máseleler talqylandy. Sonymen qatar, eskertkishterdi qorǵaý, saqtaý, nasıhattaý jumystaryn júıeli jolǵa qoıýdaǵy ǵylymnyń orny syndy taqyryptar tóńireginde pikirler aıtyldy.

                Jıyn sońynda kelgen qonaqtarǵa qoryq-mýzeıdiń baspa ónimderi syıǵa berildi.