Búginde «Qazaqstan Turǵyn úı-qurylys jınaq bankiniń» usynyp otyrǵan «Nurly jol» jáne «Óz úıim» memlekettik baǵdarlamalary boıynsha baspanaǵa qol jetkizýge múmkindik bar. Eger siz atalmysh bankten esepshot ashyp, kelisimshartta kórsetilgen qarjy kólemin aı saıyn salyp otyrsańyz, kem degende tórt jyl ishinde baspanaǵa qol jetkizýge bolady. 
– «Qoljetimdi baspana-2020» baǵdarlamasy ýaqytsha toqtatyldy.

Banktiń oblystyq bólimshelerinde «Báıterek Development» jelisi boıynsha «Nurly jol» baǵdarlamasy aıasynda turǵyn úıge ótinish qabyldaý bastalǵan. «Salymshylar ózderiniń esepshottaryn baspana máselesin sheshý úshin ashatyndyqtan, olarǵa arnalǵan tıimdi usynystar aýqymyn keńeıtýge barynsha tyrysamyz. Tıimdi sharttar men baspana sapasyn aldyńǵy orynǵa qoıyp, atalmysh baǵdarlama boıynsha 30 paıyzdyq bastapqy jarnamen nesıe beremiz, - deıdi «Turǵyn úı-qurylys jınaq banki» AQ Shyǵys Qazaqstan oblystyq fılıalynyń mamany Arhat Asaýbaev.
«Turǵyn úı-qurylys jınaq banki» salymshylarynyń depozıtinde bir jylda 450 myń teńge jınalatyn bolsa, oǵan memleket tarapynan 90 myń teńge syıaqy qosylady. Al eger keminde 200 myń teńge jınaıtyn bolsańyz, onyń ústine 40 myń teńge syıaqy mólsherlemesi beriledi. Jalpy, jeke baspanaǵa qol jetkizý úshin ıpoteka arqyly da úı alýǵa bolady. Alaıda, qarjy mamandarynyń aıtýynsha, bul tıimsiz ádis kórinedi.

«Jas otbasy» memlekettik baǵdarlamasy boıynsha baspana alý úshin sońǵy bes jylda otbasy músheleriniń atynda jyljymaıtyn múlik tirkelmeýi tıis. Sonymen qatar, atalmysh baǵdarlamaǵa jastary 29-ǵa tolmaǵan jas otbasylar ǵana qatysa alatynyn aıta ketken jón.

Aqan Bektas