Almaty ákimi Baýyrjan Baıbek jumys sapary barysynda jaıaý júrginshige basymdylyq beretin Panfılov, Jibek joly, Gogol, Qabanbaı batyr kósheleri men «Astana» alańynyń qaıta jasalýyn tekserdi, merdiger uıymdardyń nazaryn jumystyń sapasy men belgilengen merzimde aıaqtalýyna aýdardy, dep habarlaıdy Qamshy.kz aqparat agenttigi qalanyń baspasóz qyzmetine silteme jasap.
Qala ákimine qazirgi kezde jylý júıelerin aýystyrý jumystarynyń aıaqtalǵany,aryq lotoktarynyń tóselgeni, kespe tastar negiziniń jasalǵany, kóshe jaryǵy jelileriniń tartylǵany, qurǵaq sýburqaqtardyń iske qosylǵany baıandaldy. Kelesi aptadan bastap joǵaryda atalǵan kóshelerde biryńǵaı arhıtektýralyq stıl qalyptastyrý úshin nysandardyń syrtqy betterin jańartý jumystary bastalady.Burynnan bar jasyl jelekter sol boıy saqtalady. Kómeski keńistikti keńeıtý maqsatynda bıik aǵashtar, qaıyń, emen jáne basqalary, myńnan astam buta-shilik otyrǵyzý qarastyrylǵan.Jalpy 330 myń sharshy metr jerge jasyl jelek otyrǵyzylady.
Jibek joly kóshesin Qonaev kóshesinen Jeltoqsan kóshesine deıin qaıta jasaý barysynda Arbat burynǵy kelbetin saqtaıdy,tolyq abattandyrylady jáne jeke fýnksıonaldy aımaqtarǵa bólinedi. Demalys oryndary artady, burynnan bar fontandar qaıta jasalady, sport jáne balalar alańdary paıda bolyp, kespe tastyń ornyna joǵary sapaly granıt tóseledi.
Panfılov kóshesi boıymen Qabanbaı batyr kóshesinen bastap Jibek jolyna deıingi aralyqtaǵy jaıaý júrginshi jolyna da granıt tóseledi, munda da demalatyn oryndar, sport jáne balalar alańdary, abattandyrylǵan velojoldar bolady. Atap óterlik jaıt, jóndeý jumystary bastalǵan kezde kóne qalanyń eski kespe tastary tabylǵan edi, jobanyń jalpy kompozısıasynda olar da paıdaǵa asady.
«Astana» alańynda kólik qozǵalysy jolaǵy qysqarady, bosaǵan keńistikterge qosymsha aǵashtar otyrǵyzylady, eki qurǵaq sýburqaq paıda bolady. Osylaısha, jaıaý júrginshiler men kólik legi ekige bólinedi, avtoturaq aımaǵy shekteledi. Alańnyń soltústik bóligine ekologıalyq taza granıt tastar tóseledi.
Qabanbaı batyr men Gogol kóshelerinde qozǵalys bóligin shekteý qarastyrylmaǵan, biraq jaıaý júrginshi jolynyń túgel boıyna kólik qoıýǵa tyıym salynady,avtomobıldi tek arnaıy jabdyqtalǵan «qaltalarda» ǵana qaldyrýǵa bolady. Trotýarlarǵa granıtti jáne betondy plıtkalar tóseledi, gazondardy qorǵaý úshin butaq-shilikter otyrǵyzylyp, balalar alańdary jáne basqalary uıymdastyrylady.
