Soltústik Qazaqstan oblysynyń turǵyndary hırýrg-rentgenolog Dmıtrıı Tó men Igor Levın obyr dertiniń aldyn alýǵa arnalǵan mobıldik qosymsha oılap tapty dep Qamshy.kz aqparat agenttigi 24.kz-ke silteme jasap habarlaıdy .

«Ázirge bul pılottyq joba. Sondyqtan áli de túzetýdi qajet etedi», – deıdi mamandar.

Olar «Onkoskrın» dep atalatyn baǵdarlamany qyrkúıek aıyna deıin tolyqtaı iske asyrýdy josparlap otyr. Keıin qosymshany kez kelgen adam qalta telefonǵa júktep alady.

Arnaıy saýalnamalarǵa jaýap berý arqyly qosymsha sút jáne qýyqaldy bezdi, jatyr moıynyn, asqazan men ishektegi aýrýlardy erte basta anyqtaýǵa múmkindik beredi. Munymen qatar naýqastar onkologıalyq dıspanser mamandarymen onlaın rejımde suhbattasa alady.

Jalpy Soltústik Qazaqstan oblysy elimizde qaterli isik aýrýy boıynsha kósh bastap tur. Bıyldyń ózinde óńirde 900-ge jýyq adamnan obyr derti anyqtalǵan.

Dmıtrıı Tó, joba avtory:

– Mobıldik qosymsha azamattarǵa tek usynys jasaıdy. Iaǵnı testtiń qorytyndysy boıynsha aýrýdyń alǵysharttary anyqtalsa, skrınıngten ótýge nemese dárigerge qaralýyna keńes beredi. Sondaı-aq munda elimizdegi onkologıalyq dıspanserlerdiń barlyq tizimi bolady.

Igor Levın, jobany ázirleýshi:

– Daıyn bolǵan baǵdarlamany biz Playmarket pen Appstore-da jarıalaımyz. Ol kez kelgen gadjette jumys jasaı beredi. Qazir jobany qarapaıym, ıaǵnı azamattarǵa túsinikti bolý úshin barynsha jaǵdaı jasap jatyrmyz. Aldaǵy ýaqytta ony qazaq tiline aýdarýdy da josparlap otyrmyz.