Jýrnalıs ári Ózbekstannyń birinshi prezıdenti Islam Kárimovtyń týǵan jıeni Djamshıd Kárimovtyń psıhıatrıalyq emhanadan shyqqanyna jarty jyldan asty. Jyndyhanada 11 jylyn ótkizgen prezıdenttiń týysy áli kúnge deıin tól qujatyn ala almaı júr, dep jazady Qamshy.kz aqparat agenttigi jergilikti Ortalyq Azıa portalyna silteme jasap.

«2006 jyldyń jazynda Shvesıaǵa ketý úshin qujattar daıyndap júrgenimde tólqujatymdy tartyp aldy. Sóıtip kúshpen jyndyhanaǵa jatqyzdy. Sodan beri tólqujatsyz júrmin. Qyzym prezıdent Shavkat Mırzıeevtiń vırtýaldy qabyldaýyna júgingen, alaıda jaýap joq. Ádeıi istep otyr ma, álde ádettegi ózbek búrokratıasy ma – bilmedim. Tólqujatsyz zeınetaqy da ala almaımyn, jumysqa da ornalasa almaımyn. Qazir qolymda qyzym bergen sońǵy 6 myń som bar», – deıdi Djamshıd Kárimov.  

Ózbekstannyń alǵashqy prezıdentiniń úlken aǵasy Arslan Kárimovtiń uly Djamshıd Kárimov Djızake qalasynyń turǵyny. 11 jyl buryn bılikti ashyq synaǵan jýrnalısi kúshtep jyndyhanaǵa jatqyzǵan.

«10 jyl 5 aıymdy jalǵyz bólmede ótkizdim. Shızofrenıa degen jalǵan dıagnoz qoıdy. Shynymdy aıtsam, aǵamnyń ólimi men úshin úlken tosyn syı boldy. Sebebi, onyń ólimi meni zyndannan qutqardy», – dedi Kárimovtyń jıeni.

Sondaı-aq, Djamshıd Kárimov eshqandaı bógetke qaramastan jýrnalıs retinde óz jumysyn jalǵastyratynyn aıtty.