Feısbýkte alaıaq retinde aıyptalǵan Sandýǵash Jumabek 5 jylǵa bas bostandyǵynan aıyryldy. Sot búgin Astanada ótken, dep jazady Qamshy.kz aqparat agenttigi. Bul týraly Aıgúl Orynbek Feısbýktegi paraqshasy arqyly tikeleı efırge shyqqanda málimdedi.

Halyqtan súıinshi suraǵan Aıgúl Orynbek Sandýǵash Jumabekti sot zalynan qamaýǵa alyp ketkenin aıtty.

 «Úkim shyqty. Sandýǵash Jumabek 5 jylǵa bas bostandyǵynan aıyryldy, sot zalynan qamaýǵa alyndy. Qoǵamda kóterilgen másele óz sheshimin tapty. Sandýǵash Jumabek zańdy túrde óz jazasyn aldy», – deı kele, osy iske sońyna deıin atsalysqan dostaryna alǵysyn aıtty.

«Qýanyshym kókke jetip otyr. 20 jyl boıy jezqazǵandyqtar bere almaı kelgen zańdy jazasyn Astanadaǵy biz berdik», – dedi Aıgúl Orynbek.

Onyń aıtýynsha, Sandýǵash Jumabek alaıaqtyqpen ár qaladan 14 páter, oralmandardan 2 mıllıon dollar alǵan. Oralmandardy úı, azamattyq alyp beremin dep aldaǵan.

«Astananyń ózinde 200-300 mıllıondaı qaryzy bar», – dedi zańger.

Sondaı-aq, adam saýdasymen de aınalysqanyn tilge tıek etti. Jas qyzdardy túrik azamattaryna satqan kórinedi. Sońynda Qazaqstan azamattaryna óz aqyl-keńesin aıtty: «Ózderińizdiń quqyqtaryńyzdy bilip júrińizder!».

Sandýǵash Jumabektiń ózi búgin Feısbýktegi paraqshasyna «oralatynyn» aıtyp post qaldyrǵan:

«Ne ǵoı, salynbaǵan ánim kóp, jazylmaǵan jyrym mol, aıtylmaǵan sózim bar! Men oralamyn!!! Qıadaǵy qıalyma qanat bitirip, asýdaǵy armanymdy noqtalaıtyn kez keldi! Endi tek ónerim-ómirim dep, ózim úshin ǵumyr keshemin! Az-maz qıyndyqtyń kúrmeýin sheshý ǵana qaldy! Ol qolymnan keledi! Táýbe! Al, endi Alla qoldap, qorǵan bolyp, erkelegen elik qyzdaryńyzǵa sáttilik tilep, aq jol dep qoıyńyzdar! Ómir sabaǵy qashannan ashshy... Taǵdyr taıaǵy aýyr... Myńnan bireý kóterip, myńnan bireý ǵana synyp ketpeı shyǵa alady... Alla rýxymyzdy bıiktetip, ımanymyzdy bekitip, degenimizge jetkize bersin! Júrektegi oı da, nıet te, kókeıdegi jaqsylyq ta Allaǵa ǵana aıan! Tek Alla biledi, aqıqatty! Bir Alla jar bolsyn!».