Ál-Farabı atyndaǵy QazUÝ rektory, akademık Ǵalym Mutanov bastaǵan qazaqstandyq delegasıa «Skolkovo» ınovasıalyq júıelerine saparmen baryp qaıtty. Inovasıalar, ǵylym men joǵary tehnologıalardy ortaq damytý týraly kelisim is-sapardyń basty nátıjesi bolyp tabyldy, dep jazady Qamshy.kz aqparat agenttigi.
Delegasıa «Skolkovo» qory jáne aımaqtyq damý departamentiniń basshylyǵymen, sondaı-aq tehnoparktiń bas dırektory jáne onyń turǵyndarymen kezdesti. Kezdesý barysynda ekijaqty yntymaqtastyqty damytý jáne ortaq ınovasıalyq jobalardy júzege asyrý máseleleri talqylandy.
QazUÝ-da ınovasıalyq jáne medısınalyq-bıologıalyq klasterdi, sondaı-aq Qytaı úkimeti tarapynan alynatyn sýperkompúter negizinde Jańa Jibek joly ýnıversıtetteri Alánsynyń İT-tehnoparkin qurý jobalary Reseı áriptesteriniń erekshe qyzyǵýshylyǵyn týdyrdy.
«Skolkovo» ókilderi energotıimdilik jáne energıany únemdeý, ıadrolyq jáne kosmostyq tehnologıalar, telekomýnıkasıa jáne bıomedısına, İT tehnologıa jáne baǵdarlamalyq jasaqtama sıaqty basym baǵyttar boıynsha ortaq jumystar júrgizýge daıyndyqtaryn bildirdi.
Taraptar sonymen qatar jınaqtalǵan tájirıbeni ortaq komersıalaý jáne olardy eki memleket ekonomıkasynyń naqty sektoryna engizýge daıyndyqtaryn jetkizdi.
Massachýsets tehnologıalyq ınstıtýtynyń (AQSH) qatysýymen jáne ózara seriktestikte qurylǵan Skolkovo ǵylym jáne tehnologıa ınstıtýtyna sapar barysynda joǵary bilikti mamandardy, sondaı-aq zertteýshiler men kásipkerlerdiń jańa býynyn daıyndaý máseleleri talqylandy.
«Skolkovo» quramynda ınovasıalyq ortalyq, arnaıy qor, ǵylym jáne tehnologıa ınstıtýty («Skolteh»), shamamen eki myńǵa jýyq turǵyndar bar. Olar komersıalaýdyń jalpy deńgeıiniń 124 mlrd. rúblden asatyn ǵylymı-zertteý jáne kásipkerlik qyzmetterin atqarady.
