Qazaqstanda "7-20-25" baǵdarlamasy boıynsha beriletin nesıelerdiń maksımaldyq somasy belgili boldy, - dep habarlaıdy Tenginews.kz.
QR Ulttyq bank tóraǵasynyń orynbasary Oleg Smolákovtyń aıtýynsha, iri qalalarda turǵyn úıdiń maksımaldyq baǵasy - 25 mıllıon teńge, al óńirlerde - 15 mıllıon teńge bolady.
"Qazir biz turǵyn úıdiń maksımaldyq baǵalaryn bekittik. İri qalalarda turǵyn úı baǵasy 25 mıllıon teńgege deıin barady dep otyrmyz. Iaǵnı, Almaty, Astana, Atyraý, Aqtaý qalalarynda. Qalǵan óńirlerde - 15 mıllıon teńge. Osy málimetterge qaraı otyryp jáne alǵashqy jarnanyń tólengenin eskersek, qazaqstandyq páterdi 25 mıllıon teńgege alatyn bolsa onyń nesıesi 20 mıllıon teńge, al 15 mıllıon teńgege alatyn bolsa, nesıe somasy 12 mıllıon teńge bolatynyn kórip otyrmyz", - dedi QR Ulttyq bank tóraǵasynyń orynbasary.
Sondaı-aq, Oleg Smolákov baǵdarlamanyń osy jyldyń ekinshi jartysynda júzege asyrylatynyn aıtty.
"Baǵdarlama mamyr aıynda qabyldanady dep kútip otyrmyz. Qazir biz jalpy banktermen sharttarǵa qatysty máselelerdi tekserip jatyrmyz. Osy jyldyń ekinshi jartysynan bastap baǵdarlama júzege asyrylady dep otyrmyz. Sol ýaqytqa deıin osy nesıelerdi alatyn enshiles uıymdardy quramyz dep oılaımyn", - deıdi Oleg Smolákov.
Eske sala keteıik, naýryz aıynyń basynda Qazaqstan Prezıdenti Nursultan Nazarbaev turǵyn úı ıpotekasyn qoljetimdi ete alatyn jańa "7-20-25" baǵdarlamasyn tanystyrǵan bolatyn.
"(...) Jumys isteıtin árbir qazaqstandyq tómendegideı sharttar boıynsha teńgemen nesıe alý múmkindigine ıe bolady. Nesıe ósiminiń mólsherlemesi qazirgideı 14-16 emes, jylyna 7 prosentten aspaıtyn bolady. Qazir bankter bastapqy jarnaǵa baspana qunynyń 30 prosentine deıin, keıde tipti 50 prosentin salýdy talap etse, bul baǵdarlama boıynsha ol 20 prosentten aspaýǵa tıis. Nesıe alýshynyń aı saıynǵy tólemin azaıtý úshin onyń merzimi 10-15 emes, 25 jylǵa deıin bolady. Ol úshin Ulttyq banktiń, ekinshi deńgeıli bankter men qor naryǵynyń múmkindikterin iske qosý kerek.", - dep túsindirgen edi Nazarbaev.
Sondaı-aq, osyǵan deıin "7-20-25" ıpotekasy qashan berile bastaıtyny aıtylǵan edi.
