Iýnýs Emre atyndaǵy túrik mádenı ortalyǵynyń uıymdastyrýymen jáne Túrkıanyń Qazaqstandaǵy Elshiligi men  Qazaqstan Respýblıkasynyń Ulttyq mýzeıiniń qoldaýymen 2018 jylǵy 15 mamyr kúni saǵat 15.00-de «Osmanly memleketi men Orta Azıa handyqtary qarym –qatynastarynyń qujattary» atty kórmeniń ashylý saltanaty ótedi.

Atalǵan kórme «Rýhanı jańǵyrý» baǵdarlamasy aıasynda uıymdastyrylady.  Kórmege Osmanly memleketi men Orta Azıa handyqtarynyń qarym-qatynastaryn baıandaıtyn 40  qujat qoıylady. Olardyń barlyǵy Túrkıa memleketine qarasty Osmanly muraǵatynan alynǵan. Qujattar arasynda Qazaq hany Muhammet Qaıyp han men Osmanly sultanynyń 1713 jyly jazylǵan hattary sıaqty derekter Qazaqstan halqyna tuńǵysh ret usynylady.

Atap ótetin bolsaq, kórmege qoıylatyn hattardyń ishinde

- Qazaq hany Qaıyp Muhammedke joldanǵan sultannyń hatynyń kóshirmesi (1713 jylǵy 21 tamyz);

- Qazaq hany Qaıyp Muhammed  joldaǵan on bólek syı-sıapat tirkelgen dápterdiń kóshirmesi (1713 jylǵy  21 tamyz);

-Qazaq hany Qaıyp Muhammettiń elshisi Seıit Muhammedqul beı tapsyrǵan hattyń aýdarmasynyń kóshirmesi (1714 jyl 16 qańtar);

- Qazaq hany Qaıyp Muhammedtiń  elshisi Muhammed quldyń aýyzsha sáleminiń qaǵazǵa túsirilgen nusqasy (1714 jylǵy 16 qańtar);

-Qazaq hany Qaıyp Muhammedten kelgen hattyń kóshirmesi (hatta Osmanly memleketiniń shynaıy dosy ekenderi, ár daıym duǵa etetinderi týraly jazylǵan, 1716 jylǵy  14 jeltoqsan);

-  M. Lessardyń Orta Azıa saıahaty týraly «Central Asia No1» dep atalatyn raportynyń tanystyrylymy (1883 jyl);

-  Túrkistan aımaǵynyń Berlınde basylǵan kartasy (1862 jyl) tárizdi mańyzdy qujattar bar.

Sondaı-aq Buhara, Hıýa jáne Qoqan handyqtary men Osmanly memleketiniń qarym -qatynastaryn kórsetetin basqa hattar, mańyzdy derekter men kartalar da kórmege qoıylady.

Eksponattardyń arasynda Túrkıa Memlekettik arhıviniń tartýy retinde  qazaqtardyń Túrkıaǵa kóshine qatysty qosymsha qujattar da bar.  

Kórme ashylardan bir kún buryn 14 mamyrda Qazaqstan Ulttyq muraǵatynda Osmanly muraǵatynyń tanystyrylymy ótedi. Jıynda Túrkıa Respýblıkasy Premer-Mınıstrligine qarasty Memlekettik muraǵattar basqarmasynyń bas dırektory, profesor Ýgýr Únal,  Qazaqstandyq arhıv qyzmetkerleri  men tarıhshylar bas qosady.

«Osmanly memleketi men Orta Azıa handyqtary qarym–qatynastary qujattarynyń» kórmesi 20 mamyrǵa deıin jalǵasady. Kórme Ulttyq mýzeıdiń Atrıým zalynda ótedi.

Meken-jaıy: Astana q., Qazaqstan Respýblıkasynyń Ulttyq mýzeıi, Táýelsizdik dańǵyly 54, 2 blok, 2 qabat, Atrıým hol