Búgin Halyk qarjy tobynyń 2018 jyldyń 1 toqsanyndaǵy qyzmetiniń qorytyndysyna arnalǵan baspasóz jıynynda «Qazaqstan Halyq banki» AQ basqarma tóraıymy Úmit Shaıahmetova Qazkom men Halyk-ty biriktirý prosesiniń barysymen tanystyrdy, dep habarlaıdy Qamshy.kz aqparat agenttiginiń tilshisi. Shaıahmetovanyń aıtýynsha, Qazkom jáne Halyk bank qyzmetkerleriniń sany qysqaratyn bolady.
Alaıda banktiń basqarma tóraıymy «qazkomdyq» qyzmetkerlerdi qysqartyp, «halyqtyq» qyzmetkerlerdi qaldyramyz degen túsinikten arylýdy eskertti. Qazirgi ýaqytta eki bankte de jańa qyzmetkerlerdi qabyldaý týraly moratorıı júrip jatyr.
– Biz tek myqty mamandardy tańdaımyz. Qazirde eki bankte de moratorıı júrip jatyr. Bir qyzmetker jumystan shyǵady, ekinshisi kóship barady. Osylaısha eki banktiń qyzmetkerleri qysqarǵanymen bos oryndar qysqarmaıdy. Bul moratorıı eki bank qosylǵan ýaqytqa deıin jalǵasatyn bolady. Ol ýaqytta biz qysqarǵan qyzmetkerlerdiń sanyn qaraımyz, sodan nátıje shyǵaramyz. Al kasırler, menedjerler (zańdy jáne jeke tulǵa boıynsha) bólimderi saqtalady. Ári ınternet-bankıng, satýdyń dıstansıalyq bólimderi, bankomattyq jeli, POS-termınaldary, call-ortalyqtarynyń baǵyttary kóbeıedi. Eger atalmysh baǵyttar boıynsha qazirgi ýaqytta 80 adam jumys istese, birikken kúni 540-qa deıin jetedi. Sebebi ol ýaqytta qońyraýlar kóp shalynatyn bolady, suraqtar da kóbeıedi, biz ony túsinemiz, – deıdi Úmit Shaıahmetova.
Buǵan qosa eki bank birikken kúni qysqartý prosesi birden bolmaıdy. Bári kezeń-kezeńimen júzege asady. Alaıda bankter birikkenimen basty brend bireý, ol – Halyk bank. Shaıahmetovanyń aıtýynsha, mundaı prosestiń ózinde jumys barysy burynǵysha jalǵasatyn bolady. Klıent Qazkom-daǵy óziniń úırenshikti bólimshesine baryp, menedjer oǵan esh qıyndyqsyz qyzmet kórsetedi. Tek biryńǵaı júıe qalyptasady. Máselen Xalyk pen Qazkom tarıfteri ártúrli deńgeıde. Qazkom-nyń komısıasy Halyk-tan tómen. Ondaıda Halyk bank óz tarıfteriniń deńgeıin tómendetedi, shyǵyn da azaıady. Esesine klıentter úshin qyzmet aıasy keńeıedi.
– Depozıtter turǵysynan eshteńe ózgermeıdi, bári sol qalpynda qalady. Qazkom tarapynan júıe qalyptasqanymen, bastysy Halyk bazasyna tıesili, – dedi Shaıahmetova.
Sonymen qatar fılıaldary jaǵynan da qysqartýlar bolady. Bul proses te júıeli túrde júzege asady. Al bank klıentteriniń artýy nemese kemýi qadaǵalanyp otyrady.
Shaıahmetova bankterdiń birigýinen úrkýdiń qajeti joq deıdi. Bul úrdis klıentter úshin de, bank qyzmetkerleri úshin de tıimdi bolatynyna sendirdi. Al Qazkom men Halyk 2018 jyldyń ekinshi jartysynda tolyǵymen birigip, ekeýine ortaq jańa strategıa qalyptasady.
Buǵan qosa Úmit Shaıahmetova Halyq banktiń 2018 jyldyń 1 toqsanyndaǵy qarjylyq nátıjelerine toqtalyp ótti.
Máselen, Qazkom-nyń kórsetkishterin eskere otyryp Halyk tobynyń taza kirisi 2018 jyldyń 1 toqsany úshin 62,1 mlrd teńgeni qurady. Bul 2017 jylǵy 4 toqsannyń nátıjesinen 63,1 paıyzǵa asyp tur. Qazkom-nyń taza kirisi 2018 jyldyń 1 toqsany úshin 32,9 mlrd teńgeni qurady.
Al qyzmetter men komısıalar boıynsha kirister 2017 jyldyń 4 toqsanymen salystyrǵanda 8,3 paıyzǵa tómendegen. Ózge paıyzdyq emes kirister 2018 jyldyń 1 toqsany úshin 10,2 paıyzǵa – 43,3 mlrd teńgege deıin tómendedi.
