Tokýro Oýchı esimdi japon jigiti otanynda Alpamys batyr jáne Manas epostyq dastandaryn óz ana tilinde oqyp, qazaq pen qyrǵyzdyń dástúri men mádenıetine qyzyqqanyn aıtady.
Osy áýestigi onyń Qazaqstanǵa kelip bilim alýyna sebep bolǵan. Takýro qazir ál-Farabı atyndaǵy QazUÝ-da joǵarǵy oqý ornyna deıingi bilim berý fakúltetinde qazaq tilin meńgerip jatyr. Bul týraly ol osy oqý ordasynyń qabyrǵasynda ótken «Shetel stýdentteriniń Qazaqstanǵa kózqarasy» atty qazaqstandyq telekópir barysynda baıandap berdi.
– Men Japonıada júrgende qazaq halqynyń «Alpamys batyr, qyrǵyz halqynyń «Manas» epostyq jyrlaryn japon tilinde oqydym. Bul epostyq jyrlar meni qatty qyzyqtyrdy. Japon tilinde basqa epostyq jyrlar joq eken. Sondyqtan ádebıettiń osy janryn zerttegim keldi. Qazaqstanǵa kelip, ál-Farabı atyndaǵy QazUÝ-ge oqýǵa túsýimniń basty sebebi de osy", - deıdi Takýro.
Jıynda qazaq tilinde taza sóılegen Takýro ózin qazaqtyń tarıhy da qatty qyzyqtyratynyn atap ótti.
– Qazir osy oqý ornynda qazaq tilin meńgerip jatyrmyn. Qazaq tilin úırenýmen qatar, osy eldiń mádenıetimen, tarıhymen, salt-dástúrimen tanystym. Ásirese, Aısha bıbi men Qarahan baba jaıyndaǵy ańyzdy oqyǵannan keıin ekeýiniń arasyndaǵy mahabbat oqıǵasy meni qatty qyzyqtyrdy. Qysqy demalysta Taraz qalasyna arnaıy baryp, tarıhı eskertkishterdi óz kózimmen kórip qaıttym, - dedi stýdent.
Sonymen qatar Takýro Qazaqstanda bir jyldan beri júıeli nátıjeler berip jatqan «Rýhanı jańǵyrý» baǵdarlamasymen de úsh tilde tanysyp shyǵypty.
İs-shara barysynda elimizdiń ár óńirindegi oqý oryndary telekópir arqyly baılanysyp, sheteldik stýdentter Qazaqstandaǵy bilim berý salasy týraly oılaryn ortaǵa saldy. «Rýhanı jańǵyrý» baǵdarlamasynyń bir jyldyǵy aıasynda ótken is-sharaǵa Italıadan kelip oqyp jatqan Darıo Kýaglıa, fılıppındik Enn Roýz Mendoza esimdi stýdentter qatysty.
Búginde qazaq ádebıetindegi epostyq dastandardy jattap, tól muramyzdyń qadir-qasıetin baǵamdaıtyn jastar neken-saıaq. Dál osy janrdan janyna azyq alyp, elimizdiń dástúri men mádenıetin batyrlar jyrynyń mazmunynan tanyǵan sheteldik stýdentter keıbir qazaq jastaryna úlgi bolsa degen tilek bar.
Araıly Jaqsylyq
