Memleket basshysynyń «Árbir otbasy úshin baspana alýdyń jańa múmkindikterin berý» áleýmettik bastamasyn iske asyrý úshin kredıtor men qaryz alýshynyń múddeleri arasyndaǵy múddeler teńgeriminiń saqtalýyn qamtamasyz etetin quqyqtyq ortany qurý qajet. Bul týraly búgin Qazaqstan Ulttyq Bankiniń Tóraǵasy Danıar Aqyshev QR Parlamenti Senatynyń plenarlyq otyrysynda baıandama jasaǵan kezde aıtyp berdi, dep habarlaıdy Qamshy.kz aqparat agenttigi QR Ulttyq bank baspasóz qyzmetine silteme jasap.

Ol baǵdarlamanyń bolashaqta ornyqtylyǵynyń mańyzdy talaby bank pen boryshkerdiń naryqtyq qaǵıdattardy saqtaýy, onyń ishinde problemalyq bereshekti
sotqa deıin retteý jáne kepil kredıtorlarynyń basymdyǵy máselelerinde saqtaý bolyp
tabylatynyn atap ótti.

«Kepil ınstıtýty jan-jaqty bolýy kerek. Kepil ustaýshynyń óz talaptaryn qanaǵattandyrý úshin kepil múlkin kedergisiz ári dereý satý múmkindigi bolýǵa tıis. Mundaı túzetýlersiz 7-20-25 baǵdarlamasyn sátti iske asyrý múmkin emes», - dep qorytyndylady Qazaqstan Ulttyq Bankiniń basshysy.

D. Aqyshevtyń aıtýynsha, zańnamalyq túzetýler qabyldanǵan jaǵdaıda, bankter
halyqqa jaqyn arada kredıtter bere bastaıdy.

Sózin qorytyndylaı kele D. Aqyshev Senat depýtattaryna osy zań jobasyn qaraý sheńberinde júrgizgen jumysy úshin alǵys bildirdi.

Ol qarastyrylyp otyrǵan zań jobasynyń qarjy naryǵyndaǵy ahýaldy aıtarlyqtaı jaqsartýǵa, bizdiń azamattardyń quqyqtaryn qorǵaýǵa jáne ekonomıkalyq ósýdi qamtamasyz etý úshin uzaqmerzimdi qorlandyrýdy qamtamasyz etýge múmkindik beretinin atap ótti.