Aǵymdaǵy jyldyń 6 aıynyń qorytyndysy boıynsha 3,5 mln adamǵa elektrondyq qoltańba berilgen. Bul týraly «Azamattarǵa arnalǵan úkimet» memlekettik korporasıanyń baspasóz qyzmeti habarlady.

2018 jyldyń birinshi toqsanynda atalǵan korporasıanyń keńseleri arqyly 17,8 mln memlekettik qyzmet kórsetilgen. Onyń 52,3 paıyzy elektrondyq formatta júzege asqan.

«Aǵymdaǵy jyldyń birinshi jarty jyldyǵynda memlekettik korporasıanyń 313 front-ofısteri arqyly 17,8 mln memlekettik qyzmetter kórsetildi, onyń ishinde 52,3% - elektrondyq túrde. Sonymen birge, 2017 jylǵy áleýmettik saýalnamanyń nátıjesi boıynsha halyqtyń memlekettik qyzmetterdiń sapasyna qanaǵattaný deńgeıi belgilengeni 85,2% bola tura, 85,4% qurady», - delingen habarlamada.

Basylym málimetinshe, Halyqqa qyzmet kórsetý ortalyqtary arqyly 17 042 293 qyzmet kórsetilgen. Onyń ishinde «Connection Point» ózine-ózi qyzmet kórsetý sektorlary arqyly 6 079 590 qyzmet usynylǵan. Mobıldi HQKO-lar arqyly 191 470 qyzmet kórsetken. Al, mamandandyrylǵan HQKO-nyń kómegimen 1 202 404 qyzmet, onyń ishinde kólikti tirkeý boıynsha 928 237 qyzmet usynylǵan. Sondaı-aq,  júrgizýshi kýálikteri 274 167 adamǵa berilse, HQKO sektorlary arqyly 572 860 qyzmet kórsetildi. Buǵan qosa, 3,5 mln turǵynǵa elektrondyq sıfrlyq qoltańba berilgen.

Aıta keteıik, 2018 jyldyń 27 shildesinde «Azamattarǵa arnalǵan úkimet» memlekettik korporasıasynyń otyrysy ótken bolatyn. Onda talqylanǵan máseleler arasynda memlekettik satyp alý, ákimshilik-sharýashylyq jáne qarjy-ekonomıkalyq qyzmeti sıaqty memlekettik korporasıa jumysynyń aǵymdaǵy suraqtarynan basqa, áleýmettik qamsyzdandyrý, memlekettik qyzmet kórsetý sapasy, jyljymaıtyn múlikti tirkeý jáne jer kadastryn júrgizý sıaqty taqyryptar. Sonymen qatar, aımaqtardaǵy memlekettik korporasıa fılıaldarynyń qyzmetindegi ishki qaýipsizdik boıynsha qyzmetiniń problemalyq máseleleri bólek bólimde qaralypty.

Otyrysta 2018 jyldyń 1-shi jarty jyldyǵynyń jumys qorytyndysy aıtylyp, 2018 jyldyń 2-shi jarty jyldyǵyna arnalǵan maqsat-mindetter qoıyldy. Atalǵan jınalysqa Memlekettik korporasıa basshysy Abylaıhan Ospanov, ortalyq apparattyń qurylymdyq bólimsheleriniń basshylary men aımaqtyq fılıaldardyń dırektorlary qatysqan.   

«Azamattarǵa arnalǵan úkimet» memlekettik korporasıasy halyqqa qyzmet kórsetetin barlyq ortalyqtardy bir júıege ıntegrasıalaıdy. Ol 2016 jyldyń 7-shi sáýirinde qurylǵan bolatyn. Onyń quramyna jer kadastry jáne jyljymaıtyn múlikti tehnıkalyq tekserý dıreksıasy, Memlekettik qyzmet kórsetý dıreksıasy, sondaı-aq «Áleýmettik tólemderdi vedomstvoaralyq esepteý ortalyǵy» dıreksıasy kiredi.