Qazaqstannyń halyqaralyq rezerviniń kólemi 2018 jylǵy shilde aıynda maýsymmen salystyrǵanda 0,61%, 2017 jylǵy jeltoqsanmen salystyrǵanda 1,58% tómendep, 87,668 mlrd AQSH dollaryn quraǵan. Bul týrly Ulttyq bank aqparat taratty.

Qarjy ınstıtýtynyń málimetine qaraǵanda, Qazaqstannyń jalpy halyqaralyq rezerviniń kólemi shilde aıynda 2,62% ósip (jyl basynan beri 0,46% ósken), 30,886 mlrd dollardy quraǵan, sonyń ishinde taza halyqaralyq rezerv 2,67% ósip (+0,51%), 30,388 mlrd dollar bolǵan.

QR Ulttyq qory aktıvteriniń kólemi 2,29% (-2,66%) tómendep, 56,782 mlrd dollardy qurady. Erkin konvertasıalanatyn valútadaǵy aktıvterdiń kólemi 18,09 mlrd dollardy qurady, bul kórsetkish ótken aıda 5,41% (al ótken jyldyń jeltoqsanynan beri 0,86% azaıǵan) ósken. Altyn valútalardyń kólemi 1,07% (+2,39%) qysqaryp, 12,796 mlrd dollardy qurady.

Bir aı buryn Ulttyq ekonomıka mınıstri Tımýr Súleımenov birinshi jartyjyldyqtyń qorytyndysy boıynsha JİÓ-niń ósimi 4,1 prosentti quraǵanyn málimdegen bolatyn. «Inflásıa birtindep azaıyp kele jatyr jáne sońǵy úsh jyldaǵy eń tómen mánge jetti. Jyl basynan beri ol 2,6 prosentti qurady, al jyldyq ınflásıa – 5,9%. Inflásıanyń barlyq komponenti boıynsha baǵa ósimi báseńdegeni baıqalady», — degen edi mınıstr.

Al negizgi kapıtalǵa salynatyn ınvestısıalar boıynsha joǵary ósý úrdisi saqtalǵan. Ósim 25,8%-ti qurady.

«Bıyl 1 maýsymyndaǵy jaǵdaı boıynsha eldiń halyqaralyq rezervteri 0,9%-ke ulǵaıyp, 89,9 mıllıard AQSH dollaryna deıin jetti. Ulttyq qordyń aktıvteri 1,5 prosentke ósti», — delingen Súleımenovtiń 10 shildedegi esebinde.