Astana qalasynyń turǵyny Dýlat Aǵadil avtobýsta minip-túsýdiń qıyndap ketkenin aıtty, dep jazady Qamshy.kz aqparat agenttigi. Bul týraly ol óziniń vıdeoúndeýin feısbýk paraqshasyna jarıalady. Onyń aıtýy boıynsha, avtobýsta adam lyq toly bolǵan kezde adamdar avtobýstan túse almaı ábigerge túsedi eken. Buǵan sebep Astana LRT kartasy eken. Naqtylaı ketsek, avtobýsqa mingen adam ahtqy jaqta ornalasqan apparat arqyly kartamen tólem jasap bolǵannan keıin mindetti túrde avtobýstyń aldyńǵy esigi arqyly túsý kerek. Avtobýstyń ishinde adam az bolsa, bul ońaı árıne, al adamǵa lyq toly avtobýsta bul qaǵıdany oryndaý aıtarlyqtaı qıynǵa soǵady. 

«Qurmetti qazaqstandyqtar, meniń bir jarym jyldan beri kóterip júrgen máselem Astana LRT-nyń kartasyna baılanysty boldy. Men ózim Astana qalasy Selınograd aýdany Talapker aýylynda turamyn. Atalmysh karta halyqqa yńǵaısyzdyq týdyrady. Bala-shaǵasymen júrgen úlken kisiler bar, múmkindigi shekteýli jandar bar, solarǵa yńǵaısyz. Basshylar qalaı oılaıtynyn men túsinbeımin. Men talaı ret ákimdikke de bardym, birneshe avtobýs parkterine de bardym. Alaıda barlyǵy bir-birine siltep, másele áli kúnge deıin qarastyrylmady. Avtobýsqa kirgen adam ortasyndaǵy nemese artynda ornalasqan apparat arqyly tólem jasap, keıin mindetti túrde avtobýstyń aldyńǵy jaǵynan túsý kerek. Sonda bala-shaǵasymen avtobýsqa mingen nemese aıaǵy aýyr áıelder, arbaǵa tańylǵan múgedekter avtobýstyń artqy jaǵynan kirip, aldynan qalaı shyǵady? Al avtobýstyń aldynan mingen adam artqy jaqtaǵy apparatqa kartasyn qoıyp, jolaqysyn tólep qaıtadan aldynan túsý kerek. Bul ne úshin jasalǵan? Halyqty qınaı berý úshin jasalǵan ba?», deıdi Dýlat Aǵadil.