Baǵdat Mýsınniń oıynsha «Bolashaq» baǵdarlamasy boıynsha shetelde oqyp jatqan stýdentterge shetelde qalýǵa ruqsat berý kerek, dep jazdy Qamshy.kz aqparat agenttigi.

«Shetelde qalǵysy keletin bolashaqtyqtar bizdiń elshilikpen baılanysta bolý kerek, ıaǵnı qaıda jumys isteıtinin aıtýy tıis. Joǵary tehnologıalyq kompanıada jumys istese ony elge qaıtyp ákelip 5 jylǵa Qazaqstanǵa baılaýdyń qajet qansha?», - deıdi Baǵdat Mýsın.

12 qazanda ótken qazaqstandyq tehnologıalyq forýmda Baǵdat Mýsın «Bolashaq» baǵdarlamasynyń maqsaty - ıntellektýaldyq deńgeıi joǵary urpaq qurý ekenin atap ótti.

«Amerıkalyq úzdik JOO-da oqyp kelgennen keıin elde jumysqa ornalasady. Onda olardyń qanatyn qaıyryp, qatyp qalǵan sheńberden shyǵarmaıdy. Odan jaqsy nátıjege jete almaımyz. Shetelde jumys istep kórý úshin múmkindik berýimiz kerek. Ol jerden qandaı da bolsyn ıdeıamen keledi nemese bizge kómektesetin jáne qazaqstandyqtarǵa úlgi bolatyn enshiles uıym qurady», - dedi Mýsın.

Ol shetelde jetistikke jetýge talpynyp júrgen qazaqtardy biletinin atap ótti.

«Biz kásipkerlerdi qoldaý týraly aıtqanda birden Qazaqstandaǵy startaperlardy eske túsiremiz. Al sheteldik naryqta jumys istep júrgenderdi oıǵa da almaımyz. Meniń aıtpaǵym, shetelde eńbek etip júrgenderge kómektesetin jáne shetelde Astana Halyqaralyq qarjy ortalyǵy túrindegi qoldaý bar ekenin, onda tirkelgen óz kompanıań bolýy múmkin ekenin túsindiretin shetel men túrli ekojúıede dıdjıtal-elshilik qurý. Onyń Delaveradan eshqandaı aıyrmashylyǵy bolmaýy kerek», - deıdi Mýsın.