Tekeli qalasynda ornalasqan Ortalyq Azıa ýnıversıtetinde mıkrokalsıt shyǵaratyn kásiporyndar úshin jumysshy mamandar oqytatyn kýrs aıaqtaldy. «Ýatyp tartatyn jáne suryptaǵysh mashınalar operatory» mamandyǵy boıynsha qysqamerzimdi oqytý 2015 jyly jergilikti jer qoınaýyn paıdalanýshylardyń usynysynan keıin Kásipkerler palatasynyń qalalyq fılıalynyń qoldaýymen ashylǵan.

Bul baǵyttaǵy mamandardy eshbir joǵary nemese orta polıtehnıkalyq oqý ornynda oqytpaıdy. Mamandardyń tapshylyǵy Tekelide alty birdeı mármár  ken orny jáne 10 óńdeýshi kásiporynnyń bar bolýymen baılanysty. Kásiporyndarda qurǵaq qurylys qospalarynyń negizgi toltyrǵyshy bolyp tabylatyn mıkrokalsıtti óndiredi.

«Tekeli óńiri elimizde shyǵarylatyn mıkrokalsıttiń 60%-nan astamyn shyǵarady. Jyl saıyn mamandar qajettiligi 10-15 adamdy quraıdy. Sondyqtan úsh jyl buryn Ortalyq Azıa ýnıversıtetinde dýaldi oqytý júıesi aıasynda arnaıy kýrs ashtyq. Qatysýshylar úshin 30% teorıalyq sabaqtar ótkizilse, sabaqtyń qalǵan 70% kásiporyndarda ótkizedi. Basty nátıjesi oqyp shyqqan azamattardyń barlyǵy jumyspen qamtylady», - dep atap ótti Kásipkerler palatasynyń Tekeli qalalyq fılıalynyń dırektory Turysbek Jumadilov.

Kýrstyń uzaqtyǵy 192 saǵat, oǵan kóbinshe kolej túlekteri men ózin-ózi qamtyǵan azamattar qatysyp keledi. Teorıalyq sabaqtardy óńdeýshi kásiporyndarda 10 jyldan astam tájirıbesi bar Turysbek Jumadilov júrgizse, tájirıbelik sabaqtardy kásiporyndardaǵy jetekshi mamandar men sheberler ótkizedi.

2015 jyldan beri «Ýatyp tartatyn jáne suryptaǵysh mashınalar operatory» mamandyǵy boıynsha qysqamerzimdi oqytýdy 65 adam támamdaǵan, sonyń ishinde bıyl oqýdy 13 adam aıaqtaǵan.