Elimiz KSRO ımperıasynan bosap, óz aldyna jeke el bolyp, táýelsizdik alǵan kúnnen beri, óshkenimiz janyp, ólgenimiz tirilip, osylaısha qaıta túlep, óz qolymyz óz aýzymyzǵa jetip, óz tarıhymyz ben tarıhty jasaýshy, tarıhı tulǵalarymyzdy eske alyp, olar týraly aıtýǵa tyń tarıhı múmkindik týdy. Táýelsizdik alǵan alǵashqy jyldary 1995 jyl IýNESKO kóleminde Abaı babamyzdyń 150 jyldyǵy, 1996 jyl el ishinde Jambyl atamyzdyń 150 jyldyǵy, 1997 j Muhtar Áýezovtyń 100 jyldyǵy atalyp ótildi. Osylaısha táýelsiz qazaq halqynyń ár jyly, ár túrli tarıhı tulǵalar mereıtoılaryna arnalǵan torqaly jyldar bolyp keledi.
Bıylǵy 2018 jylda osyndaı mereıtoılarǵa toly jyl. Semeı qalasynyń 300 jyldyǵy. Shekerim Qudaıberdiulynyń týǵanyna 160 jyl, Ahmet Baıtursynovtyń 145 jyldyǵy, Ámire Qashaýbaevtyń 130 jyldyǵy jáne t.b mereıtoılarmen qatar respýblıka boıynsha barlyq aýdandardyń qurylǵanyna 90 jyl. Sonymen birge bıyl Qazaqstannyń Halyq qaharmany, Halyqaralyq Fadeev atyndaǵy syılyqtyń laýreaty, áıgili partızan, kórnekti jazýshy II – DJS tyń erjúrek batyry, kózi tirisinde aty ańyzǵa aınalǵan halqymyzdyń qaıtalanbas birtýar perzenti Qasym Qaısenovtyń týǵanyna 100 jyl.
Osy maqalany jazýdaǵy maqsatym Qasym atamyzdyń, bizdiń Aqjar aýylynda birneshe ret bolǵandyǵy týraly. Qasym atamyz alǵash ret, 1968 jyly aýylymyzdyń ardageri, áıgili partızan Shapatov Manap atanyń shańyraǵynda boldy. Manap ata II – DJS tyń batys maıdanynda, Belarýssıa jerindegi Gomel oblysyn azat etýge qatysqan partızan otrádynyń beldi múshesi bolǵan . Manap atanyń joldasy Darabaeva Qanıpa apamyz Qasym atamyzdyń jerlesi birge oqyǵan synyptasy bolǵan eken. Qaharman atamyzdyń Manap atanyń úıinde bolǵandyǵyn búginde aýyl aqsaqaldary ańyz etip aıtady.
Ekinshi ret Qasym ata 1991 jyl, halqymyzdyń batyrlar oıanǵan jyly aýylymyzda ótken úlken mereıtoı, Qarakereı Qabanbaı batyrdyń 300 jyldyǵyna keldi. Al úshinshi ret batyr atamyz 1999 jyly parlament májilisiniń saılaýy naýqanynda, májilis depýtattyǵyna úmitker, belgili aqyn búginde Qazaqstan jazýshylar odaǵynyń tóraǵasy Ulyqbek Esdáýlet aǵamyzǵa oblystyq senimdi ókil retinde kelgen. Aýylymyzdaǵy kıeli qara shańyraq Abaı atyndaǵy orta mektepte, mektep ujymy men kezdesý ótkizgen.
Qasym atamyzdyń osy Abaı mektebine kelýi úlken tarıhı oqıǵa retinde qaldy . Partızan ardager atamyz, ujym men kezdesýde bolǵanda : « Men soǵystyń aldynda 1938 j osy mektepte dırektor bolǵanmyn» , - dep aıtqan eken.
Osy jaıtqa oraı bizdiń maqsatymyz, atamyz aıtqan derekti arhıften izdestirip tabý jáne demeýshiler uıymdastyryp, mektebimizde Qasym ata atynda pán bólmesin jabdyqtaý .
Alapat qan maıdannyń qaharmany, qaısar tulǵa Qasym atamyzdy eske alyp, ol kisiniń aýylymyzda birneshe ret bolǵandyǵy týraly aıtqanda, atamyzdy men óz kózimmen kórgen kez esime túsedi. Bul muǵalim qyzmetin endi ǵana bastaǵan alǵashqy jylym bolatyn. 2001 jyly shilde aıynda Aqsýat aýylynda Qarakereı Qabanbaı batyrdyń 310 jyldyq mereıtoıyna arnalǵan aýdandyq konferensıanyń ereje talabynan ótip, osy jıynǵa qatystym. Mádenıet úıiniń kórermen zaly saltanatty túrde bezendirilip, kóterińki mýzyka oınap, konferensıa bastalǵan sátte, aýdan ákimi búgingi bizdiń qurmetti qonaǵymyz Qasym atamyzǵa sóz bereıik degende, aq samaıly, úlken kózdi, som deneli kisiniń, minbege kelip, kópshilikpen amandasa kele, Qabanbaı batyr jaıynda daýystap aıtqan qatty daýysy men jalyndy sózderi búkil zaldy jańǵyrtyp jiberdi. Zalda otyrǵan júzden asa kórermen tym tyrys bolyp, barlyǵy batyr atanyń erekshe kelbeti men bitim bolmysyna tamsandy. Mine bul qaharman Qasym Qaısenov atamyz bolatyn. Bıyl elimizdiń ár jerinde Qasym atamyzdyń 100 jyldyǵy atalyp ol kisiniń eren erlikteri týraly aıtylǵanda, esime osy jaıttar túsedi.
Bul sýret 1968 jyly mamyrda Aqjar aýyly Shapatov Manap ata úıine Qasym atamyzdyń kelýi. Ońnan solǵa qaraı : Shapatov Manap ata, Darabaeva Qanıpa apa, Qasym ata.
1999 jyl Aqjar aýyly Qasym atamyzdyń parlament májilisi depýttatyǵyna saılaýǵa túsýshi Ulyqbek Esdáýlet aǵamyzǵa oblystyq senimdi ókil bolyp kelýi . Árimbek Masalovtyń shańyraǵynda.
Sýrette : Ortada otyrǵan Qasym atamyz . Ońnan solǵa qaraı turǵandar : ekinshi aqyn Ulyqbek Esdáýletov , úshinshi Sháriphan Halyqov - Aqjar aýyly ákimi, besinshi Serik Tynybaev - aýdandyq Tarbaǵataı nury gazetiniń redaktory, altynshy aqyn , aýdandyq senimdi ókil Árimbek Masalov.
SHQO Tarbaǵataı aýdany
Aqjar aýyly Abaı atyndaǵy
orta mekteptegi tarıh pániniń muǵalimi
Qabıdoldın Qýanysh Tileýhanuly
