Astanalyq zaǵıp jasóspirim mentaldy arıfmetıka boıynsha ISMA-2019 halyqaralyq olımpıadasynda sýperchempıon kýbogyn jeńip aldy. Ortalyqta oqyǵan kezinde Abylaı Mustafın aýdıo jazbadaǵy materıaldardy Braıl qarpine aýdarýmen aınalysypty dep jazady Qamshy.kz aqparat agenttigi sputniknews.kz  saıtynyń deregin negizge alyp. 

"Bala ózgelermen teń dárejede olımpıadaǵa qatysty. Ol metodıka avtory Gúljan Berdibekovaǵa akademıalyq materıaldardy kózi nashar kóretin jáne zaǵıp jandarǵa arnalǵan qaripke aýdarý týraly oı tastaǵan bolatyn", - dep habarlaıdy ISMA ortalyǵy.

Shara Astanada 8 naýryzda ótken. Olımpıadaǵa barlyǵy 559 oqýshy qatysypty. Týrnırge álemniń alty elindegi oqý ortalyqtarynyń mamandary tórelik etti. Olımpıada 11 akademıalyq deńgeı jáne 5 birdeı jas kategorıasy boıynsha ótken. Jarys qorytyndysyna sáıkes 43 qatysýshy kýbok jáne sýperchempıon tıtýlyn ıelenip, 96 adam chempıon kýbogyn jeńip aldy, qalǵandary birinshi, ekinshi jáne úshinshi oryndar alǵan.

Olımpıadany Reseı, Ózbekstan, Ázerbaıjan, Belarýs jáne Qyrǵyzstannyń tótenshe jáne ýákiletti elshileri kelip kórdi.

Eske sala ketsek, budan buryn Aqtaý qalasynan shyqqan 12 jastaǵy Oryngúl Arystan mentaldy arıfmetıkadan álemdik rekord ornatqan komandanyń quramynda bolǵan edi. Jarys Reseıde Ekinshi Eýrazıalyq áıelder forýmy aıasynda ótip, oǵan dúnıe júziniń túkpir-túkpirinen 150 oqýshy qyz qatysqan bolatyn. Balalar 26 mınýt 26 sekýnd 12 mıllısekýndta 30 myń esep sheshti.

Usynǵan: Ásel Bolatqyzy