Qazirgi kezdegi qazaq psıhologıasy álemdik bilim keńistigindegi sony baǵyttarǵa jáne elimizdegi qoǵamdyq suranystarǵa saı damyp qalyptasyp keledi. Psıhologıa ǵylymynyń bastaýlarynda turǵan, qazaq psıhologıasynyń ózindik órnegin ǵylymı túrde negizdep, búgingi psıhologıa ǵylymynyń qalyptasýy men damýy tarıhynyń tórinde esimderi erekshe atalatyn J.Aımaýytov jáne T.Tájibaev syndy kórnekti ǵalymdarymyzdyń orasan zor eńbekterin saralap, qazirgi urpaqqa jetkizýde ózindik mektebi bar ǵalym, psıhologıa jáne pedagogıka ǵylymdarynyń doktory, profesor Q.B. Jaryqbaevtyń jetekshiligimen kóptegen jumystar atqarylýda. Elimizde tuńǵysh ret ashylyp otyrǵan «Qazaq psıhologıalyq qoǵamy» sonyń bir aıǵaǵy bolyp tabylady. Keńestik dáýirde , ıaǵnı 1958 jyldan 1991 jylǵa deıin KSRO psıhologtary qoǵamynyń bólimshesi retinde Qazaqstan psıhologtar qoǵamy bolǵan, alaıda táýelsiz elimizdiń tól tarıhynda mundaı qoǵam alǵash ret qurylyp otyr.
QR Ádilet Mınıstrliginde Qoǵamdyq ǵylymı birlestik retinde bekitilip, tirkelgen «Qazaq psıhologıalyq qoǵamynyń» resmı tusaýkeseri 2015 jyldyń 15 mamyrynda akademık T.Tájibaev atyndaǵy etnopedagogıka jáne etnopsıhologıa ǵylymı-zertteý ortalyǵynda ótti. Atalǵan is-sharaǵa osy saladaǵy tanymal ǵalymdar, Almaty qalasyndaǵy JOO oqytýshylary qatysty. Jıynnyń saltanatty ashylý rásiminde alǵashqy sóz profesor Q.B.Jaryqbaevqa berildi. Profesor elimizdegi psıhologıa ǵylymy boıynsha qazirgi ýaqytta atqarylyp jatqan jumystarǵa toqtalyp, onyń damý baǵyttaryn atap ótti. Sonymen qatar osyndaı qoǵamnyń qurylýy qazaq ulttyq psıhologıasyn tereń zertteýge, ǵylymı jumystardy jandandyrýǵa yqpal eteri sózsiz ekendigin tilge tıek etti.
Tuńǵysh ret qurylyp otyrǵan bul qoǵamnyń urpaq tárbıesine qosar úlesi zor ekenin aıta otyryp, joǵary oqý oryndarynyń kafedra meńgerýshileri atap aıtqanda , ál-Farabı atyndaǵy Qazaq ulttyq ýnıversıteti Fılosofıa jáne saıasattaný fakúlteti Jalpy jáne etnıkalyq pedagogıka kafedrasynyń meńgerýshisi, p.ǵ.d., profesor A.Q.Mynbaeva, Abaı atyndaǵy QazUPÝ Bilim berý psıhologıasy jáne áleýmetik komýnıkasıalar kafedrasynyń meńgerýshisi, psıh. ǵyl.kandıdaty, dosent U.S.Nurǵalıevalar qoǵamǵa aq jol tilep, óz oılaryn ortaǵa saldy. Elimizdiń tanymal ǵalymdary M. Qudaıqulov, A.T. Aqajanova, R.B. Basharov, I.Á.Abeýova, M.Q. Bapaeva, G.A. Qasen, aǵa oqytýshy S.Á. Ramazanova jáne ortalyqtyń dırektory, p.ǵ.k., dosent B.A.Árinova bul qoǵam psıhologıa ǵylymynyń qalyptasýy men damýynda kóshbasshy bolatyn irgeli ıdeıalar men tegeýirindi tujyrymdardy júzege asyratyn ǵylymı ortaǵa aınalýy tıis degen tilekterin bildirdi.
Jıyndy psıhologıa ǵylymynyń doktory, Qazaqstan ulttyq jaratylystaný ǵylymdary akademıasynyń akademıgi jáne qurylyp otyrǵan jańa qoǵamnyń Prezıdenti M.Perlenbetov qorytyndylap, bolashaqta atqarylatyn isterge toqtaldy. Qoǵamnyń basshysy sonymen qatar bul qoǵamnyń qazaq psıhologıasynyń halyqaralyq psıhologıa arenasyna shyǵýyna ashylǵan jol ekenin erekshe atap kórsetti.
Árinova B.A.
ál-Farabı atyndaǵy QazUÝ, jalpy jáne etnıkalyq pedagogıka kafedrasynyń dosenti, p.ǵ.k., T.T.Tájibaev atyndaǵy etnopsıhologıa jáne etnopedagogıka ǵylymı-zertteý ortalyǵynyń dırektory
Shaǵyrbaeva M.D.
ál-Farabı atyndaǵy QazUÝ,jalpy jáne etnıkalyq pedagogıka kafedrasynyń dosenti, p.ǵ.k., T.T.Tájibaev atyndaǵy etnopsıhologıa jáne etnopedagogıka ǵylymı-zertteý ortalyǵynyń dırektorynyń orynbasary
