Belgili satırık Muhtar Sherim óziniń áleýmettik jelidegi paraqshasynda «Aldaraspan» teatrynyń dırektory Nurjan Tólendıevke ókpesi qara qazandaı ekenin aıtyp, jazba jarıalady. Satırıktiń aıtýynsha, aldaǵy ýaqytta ártis áleýmettik jelide keshirim suramasa, sotqa shaǵymdanýy múmkin ekenin aıtyp, eskertý jasady dep habarlaıdy Qamshy.kz aqparat agenttigi.
Biz Muhtar Sherimniń jazbasyn oqyrmanǵa qolaıly bolýy úshin, tolyq berýdi jón dep taptyq.
"Aldaraspan" ázil-syqaq teatrynyń jetekshisi, ártisi Nurjan-Týka Tólendıev inimdi jurttyń bári jaqsy kóredi. Men de qurmetteımin. Ónerin. Talantyn. Osy ýaqytqa deıin onyń talantyna mahabbatym mazdap tur edi, "Aldaraspandy" kórip otyryp, oǵan degen ystyq yqylasyma bireý sý sepkendeı, áldekim meni yńq etkize tepkendeı, tańdaıymda qurǵaqshylyq bolyp, qańsyp kepkendeı, sileıdim de qaldym.
Nege deısizder ǵoı? "Týka" inimniń ury ekenin kórip, kózderim alaqandaı, kóńilim jorǵalap bara jatqan taraqandaı boldy! Oıpyrmaı, bular da taýsylady eken ǵoı! Taýsylǵan soń urlyqqa barady eken ǵoı? Ol meniń úıime urlyqqa túsken joq, ol meniń shyǵarmamdy, satıramdy urlap ketti! Tal túste!
Áleýmettik jelilerde jarıalanyp ketken "Sırıaǵa kettim!" atty satıramdy urlap, monolog janrynda aıtyp shyqty! Keıipkerimniń áıeli "Sıyrǵa kettim!" dep kúıeýine hat jazyp ketkisi keledi, biraq saýatsyzdyǵynan "Sırıaǵa kettim!" dep jazyp qoıǵan. Oqıǵa osylaı órbıdi. Nurjan inimniń satıramdy oryndaǵanyna máz bolar edim-aý! Biraq uıattan jurdaı, ásheıinde sahnada ulaǵatty sózder aıtýǵa kelgende aldyna jan salmaıtyn inim "Sırıaǵa kettim" satıramdy oryndaǵanda, efırde "avtory Nurjan Tólendıev" dep berdi. Bul ne sonda? Tonaý ǵoı? Dereý ózine qońyraý shaldym.
"Oıbaı, sizdiki me edi? Maǵan vasappen kelip edi... Keshirińiz... Televıdenıege aıtyp, famılıańyzdy qoıdyrtamyn" dep aqtalyp jatty uıalmastan. (Bul daýysyn jazyp aldym.)
Sonda qalaı, vasappen avtorsyz kelgen ázilderdi Tólendıev myrza ózi jazǵandaı ıelenip kete bere me? Avtorlyq quqyǵymdy talap etip, sotqa shaǵymdanýym, moraldyq shyǵyn talap etýim múmkin. Ózime shaq terime syımaı, ári jaqsy kóretin inimdi ury deýge qımaı otyrmyn... Osy baǵdarlamasynda meniń taǵy bir satıramdy ıemdenip ketipti. Sýsıd týraly jazǵanmyn. Ideıamdy, oqıǵany urlaǵan. Ony da dáleldeı alamyn.
Kezinde "Shansharǵa" "Úbán" atty ázilimdi ózim berip, osy Nurjan tamasha oryndap shyqqan edi. "Aldaraspanǵa" "Evromolamdy" berip, erekshe oryndap, taǵy bir qýantyp edi. Endi mine, eńsem esikke qysylyp, unjyrǵam un bolyp otyr! Shynynda, "Aldaraspan" keıingi kezde alasaryp, alaq-julaq ete bastady, sóıtsem, taýsyla bastapty ǵoı! Eger maǵan áleýmettik jelide keshirim suramasa, avtorlyǵyma nuqsan keltirmese, jaǵdaıy ýshyǵyp tur "Týkanyń"...
