Ár qadam saıyn shashylyp jatatyn temeki tuqyly kim-kimdi de mezi eteri anyq. Bolmashy nárse ǵana bolyp kóringenimen temekiden soń qalatyn temeki tuqylynyń tabıǵatqa keltirer zalaly plasık qaldyqtardan kóp bolmasa, az emes. Osyny eskergen golandıalyq "Crowded cities" kompanıasy qalany qorshaǵan ortaǵa zıandy temeki tuqyly men qaldyqtarynan tazalaýǵa bilek sybana kirisken.

Golandıalyqtar bul máselemen qalaı kúresip jatyr dep oılaısyz? Adam sengisiz, arnaıy úıretilgen qarǵalar arqyly. Kompanıa ókilderi qustarǵa jańǵaq beretin qurylǵyny qalaı durys paıdalaný kerektigin úıretken. Qarǵa temeki tuqylyn arnaıy qoqys konteınerine salsa bolǵany, apparat arahıs jańǵaǵyn usynady.

Qarǵa – óz paıdasyn alystan sezetin aqyldy qus, ári biriniń istegenin biri aınytpaı qaıtalaýǵa sheber. Tabıǵat tartý etken osy qasıetteriniń arqasynda, olar kóshe sypyrýshylardyń ózi kóre qoımaıtyn tasa jerdegi temeki qaldyqtaryn taýyp, qala tazalyǵyna ólsheýsiz eńbek sińiredi.

"Crowded Cities" mamandary temeki tuqylynyń qustardyń densaýlyǵyna qandaı keri áseri baryn zerttep jatqanda, Fransıanyń Lez-Epess qalasyndaǵy oıyn-saýyq saıabaǵynyń ákimshiligi bul ıdeıany júzege asyrýǵa kirisip ketken. Saıabaqta aýlany qoqys pen temeki tuqylynan tazartýǵa úles qosam degen qarǵalarǵa jańǵaq syılaıtyn 6 jáshik ornatylǵan. Endi mundaǵy qustardy saıabaqta jumys isteıtin ujym qyzmetkerleri retinde kórýge ábden bolady.

Aýdarǵan: Dáýren Sybanbaı