Belgili aqyn, "Aıtys aqyndary men jyrshy-termeshilerdiń halyqaralyq odaǵy" respýblıkalyq qoǵamdyq birlestiginiń tórǵasy Júrsin Erman  Qamshy.kz aqparat agenttiginiń tilshisine aıtysker aqyn Rınat Zaıtovtyń qazir qaı jaqta júrgeninen habarsyz ekenin aıtty.

Júrsin Ermannyń aıtýynsha, Rınat Zaıtovty ózi de tappaı otyr.

"Rınattyń qaıda ekenin ózimde bilmeımin. Habarlasa almaı jatyrmyz. Óziniń týǵan jeri Aıagózge ketip qaldy ǵoı deımin. Naqtysyn bilmeımin. 16 maýsymda Tarbaǵataıda ótetin aıtysqa qatysý kerek bolǵan. Biraq sońǵy bolǵan jaǵdaılarǵa baılanysty tizimnen syzyldy. Aıtysty uıymdastyrýshylar "Rınatty alyp kelme" dep otyr", - dedi Júrsin Erman.

Aıtysker aqyn Rınat Zaıtov 10 maýsymda kezekten tys prezıdent saılaýynyń nátıjesimen kelispeıtinin aıtyp bir top baqylaýshylarmen birge Almatydaǵy "Alataý" dástúrli óner teatrynyń aldyna jınalǵan. Ol halyqtan saılaýda "Ámirjan Qosanovty qoldaıyq" dep aıtqany úshin keshirim surap, aldaǵy ýaqytta partıa qurǵysy keletinin aıta bastaǵanda polısıa men arnaıy jasaq jınalǵandardy jappaı ustady. Ustalǵandardyń arasynda Zaıtovta boldy.

Biraq birshama ýaqyttan keıin aqyn Youtube jelisindegi arnasy arqyly ózin polısıa bosatqanyn aıtyp vıdeo taratty.

500-ge jýyq adam Zaıtovty "óz kózimizben kórmesek, bosatylǵanyna senbeımiz" dep Almaty polısıa departamentiniń aldyna jınaldy. Rınat Zaıtov jınalǵandardyń arasyna ózi kelip, tarqaýǵa shaqyrdy.

10 maýsymnan beri Rınat Zaıtovty izdegen halyq kóp. Zaıtovtyń ózi biraq áli únsiz. Youtube arnasyndaǵy barlyq vıdeosyn óshirgen. 

♦Oqı otyryńyzdar: Rınat Zaıtov: Bári jaqsy, alańdamańyzdar!