Iá. Elordada ótken brıfıńte «Mektepter jekemenshikke berilmeıtinin kim aıtty?» dep jýrnalıs suraǵyna oblys ákiminiń tóteleı bergen jaýaby jetisýlyqtardy qanaǵattandyrmaı otyr. Sodan bolar, osydan az ýaqyt buryn burq etken daý – Taldyqorǵanda ornalasqan Nurǵısa Tilendıev atyndaǵy mekteptiń máselesi endi aımaqtaǵy Qoǵamdyq keńestiń bitpes «maltasyna» aınaldy.

Eń qyzyǵy, qalalyq «Nur Otan» ótkizgen jıynǵa saz mektebin eshkimmen aqyldaspaı senimdi basqarýǵa tapsyrǵan oqý ornynyń dırektory Ǵazıza Omarova men 15 jyl boıy «senimdi» basqarýǵa alamyn degen Music «Development» JSHS-niń basshysy Dınara Tilendıeva da kelmedi.

Osy rette biz bul másele týraly Nurǵısa Tilendıevtiń qyzy  Dınara Tilendıevamen tildesip kórgen edik. Eki-aq aýyz jaýap aldyq.

– Sálemetsiz be! Men Qazaqstanda emespin. Sóılese almaımyn, – deıdi Dinzýhra Nurǵısaqyzy.

Budan ári ata-analardyń: «Mektepti damyta alatyn qarajaty joq. Onyń basqarýyndaǵy orkestrdiń ózi memleket qarjylandyrýymen ómir súrip otyr» degen ýájin jetkizgenimizben, «Development» JSHS-niń basshysy «sóılese almady».

Eń soraqysy, jıynǵa qatysqan ustazdar men ata-analar atalǵan jaıdan ózderiniń esh habardar bolmaǵanyn aıtyp ashynyp otyr. Jaýapkershiligin «densaýlyǵyna baılanysty demalyp jatyr» degen anyqtama sózben shektegen mektep dırektorynan ázirge bir aýyz pikir alýǵa da múmkindik joq.

Osylaısha, bireýin «shetelge attandyryp», bireýin «aýyrtyp» alǵan ustazdar ákimdik jaǵalaýmen áýre-sarsańǵa túsip bitken. Áli de oń ózgeristen úmitti jurt isti oblys ákimi óz nazaryna alsa deıdi.

Aıta keteıik, jýyrda Almaty oblysynda Nurǵısa Tilendıev atyndaǵy saz mektebiniń ustazdary mekemeniń jekege ótýine  narazylyq bildirgen bolatyn. Olar óner ordasy jekeniń qolyna ótkennen keıin, muǵalimderdiń qysqarýymen qatar, oqytýdyń tólem aqysy birden kóterilip, talantty balalardyń úıirmelerge qatysýǵa múmkindikteri bolmaı qalatynyn alǵa tartady. Jarty ǵasyrdan astam tarıhy bar mektepte qazir 400-den astam shákirt tárbıelenýde. Jekege berý demekshi, oqý ordasynyń birinshi qabatyn býhgalterıa alyp qoıǵan. Munda qazir Taldyqorǵandaǵy orta mektepterdiń esepshileri otyrady.

Qozybaı QURMAN,

Sýretter ashyq derekkózderden alyndy

Almaty oblysy