Almaty alyp shahar ǵoı. Biraq astana statýsynan aıyrylyp qalǵanyna keshe birinshi ret qýandym. Qazaqstannyń astanasyn sel basyp jatyr degen aqparat aıdaı álemge tarasa, uıat bolar edi ǵoı. Al Almaty astana bolmaǵandyqtan, aqyryndap, shurqyraǵan jurtqa basý aıta otyryp, syrtqa syr bildirmeı, bul kúndi de ótkerýge bolady. Almaty oblysynyń Jambyl aýdanyna qarasty Degeres degen aýyl bar. Ol aýylda jyl saıyn tasqyn bolady. Biraq ol Almatydan júz shaqyrymdaı qashyqtyqta ornalasqandyqtan ol mekenniń seliniń «daýysy» Almatyǵa jetpeıdi. Almatyǵa jetpegen soń, Astana da bir aýyldy jyl saıyn laıly tasqyn shaıyp otyratynyn bilmeıdi de. Jyl saıyn aǵatyn selge turǵyndar da úırenip alǵan. Quzyrly oryndarǵa shaǵymdanyp, ákimine ókpelep jatpaıdy. Tasqyndy selge maldyń tólderi aǵyp ketedi. Qyrǵa ekken kartoptaryn tasqynnan soń, shelekpen saıdan terip júredi. Olar shynymen de eńbeginiń esh ketip, kartoptarynyń saıǵa aǵyp ketkenin, tóliniń selge tunshyǵyp ólgenin tabıǵı apat dep esepteıdi. Qudaıǵa jalbarynyp, jaýyn kóbeıip ketse tasattyq ta berip qoıady. Aýyldyń ishindegi toǵandardy tazartyp, artyq sýdyń aýyldyq turǵyndardy ábigerge salmaýyna qatysty jumystar ákimshilik tarapynan júrgizilýi tıis qoı degen ýájińe olar qulaq ta aspaıdy. Qulaq asqandary bola qalsa, ómir súrgenimiz ákimge mindet pe, ol jalǵyz ózi aspannan kelgen alapatqa qaıtip tótep bere alady degen ýáj aıtady. Degerestiń sýy tasysa- onyń tómengi jaǵynda ornalasqan Tarǵap aýylynyń sý bógeni de arnasynan asyp túsedi degen sóz. Bıylǵy tasqynnyń sýy Tarǵapqa jetken joq. Biraq osydan úsh apta buryn Degereste jyldaǵy zańdylyq boıynsha tasqyn júrdi. Maldyń tóli túgili, sol seldi jyl saıyn kórip júrgen úlken sıyrdyń ózi «sasqalaqtady». Ózenniń kópirleri aǵyp ketti. Úsh aptadan beri turǵyndar ózenniń arǵy jaǵy men bergi jaǵyna balaǵyn túrip tastap, aıaq kıimin qolyna ustap, sýdy keship ótedi. Kún qatty ysyǵanda álgi ózen ıreleńdegen jylan sekildi jińishkerip, ózi jup-jýas bola qalady. Álgini mynaý bizdiń aýyldyń ózeni dep aıtýǵa uıalasyń. Sebebi ózen sýy aýyldyqtardyń aryǵymen jan-jaqqa taramdalyp bólinedi emes pe? Al jaýyn jaýǵan kúni ózen eshkimge kerek emes. Sondyqtan ol arnasynan asyp, kemerine minip minez tanyta bastaıdy. Siz osydan úsh apta burynǵy Degestiń seli týraly estidińiz be? Joq. Sebebi aýyldyqtardyń ashýyn jyly sózben basýǵa bolady. Olar ańǵal ǵoı, aldap qoısań senedi. Tabanyńa tıse, mıyńdy zyrq etkizetin taýdyń tastaı sýyn tańǵy ýaqytta balaǵyn túrip keship ótip, malyn jaıǵap júre beredi.
Aınur Tóleý
