Indýstrıa jáne ınfraqurylymdyq damý mınıstrligi 2020 jyldyń sońyna deıin "Taldyqorǵan – Óskemen" avtojolynyń boıynda qozǵalys ashylatynyn, 2022 jyly tolyq paıdalanýǵa beriletinin habarlady.
Uzyndyǵy 763 shaqyrymdy quraıtyn avtojol Almaty oblysyndaǵy Qoılyq eldi mekeni men Shyǵys Qazaqstan oblysyndaǵy Shyńqoja, Úshbıik, Aıagóz aýyldarynyń mańynan ótedi.
Qurylys jumystaryn «CITIC Cinstruction Co.Ltd» JSHS, «K-Dorstroı» JSHS men «Todini Central Asia» JSHS júrgizýde. Jumystardyń sapasyn baqylaýdy «GK INJINIRIG» jáne «ZS Enginering» jaýapkershiligi shekteýli seriktestikteri júzege asyrady.
Joba boıynsha Taldyqorǵannan bastaý alatyn 32 shaqyrymdyq 4 jolaqty jol ýchaskesi İ tehnıkalyq sanatqa sáıkestendiriletin bolady. Al 731 shaqyrymdyq jol ýchaskesi 2 jolaqty İİ tehnıkalyq sanatqa saı bolmaq.
Qaıta jańartý jumystarynyń aıasynda 6 kópir, temirjoldan ótetin 3 jol ótkeli, jaryqtandyrylǵan 11 jol aıryǵy, 276 qubyr, demalys alańdary salynyp, eldi mekender mańynda avtopavılondar ornatylady.
Jalpylaı alǵanda, qaıta jańartý jumystaryna jol-qurylys tehnıkasynyń 3 myńǵa tarta birligi men 5 myńǵa jýyq maman jumyldyrylǵan. 2020 jyldyń sońyna deıin atalmysh joldyń tolyq boıynda qozǵalys ashylady dep josparlanýda. Tasjol 2022 jyly paıdalanýǵa berilmek.
Pikir qaldyrý