Búgin  memleket jáne qoǵam qaıratkeri, etnograf, tarıhshy Ózbekáli Jánibektiń týǵan kúni. Qazaq halqynyń ulttyq mádenıetiniń, ana-tiliniń, dástúri men ádet-ǵurpynyń jańaryp, damýyna eleýli úles qosqan ol búgin 89 jasqa tolar edi. Qamshy.kz aqparat agenttigi elim dep týǵan qaısar azamat Ózbekáli Jánibekke, 2021 jyly 90 jyldyǵyna oraı, ózi týǵan, qyzmet etken Shymkent qalasynda eńseli eskertkish qoıý máselesin kóterip otyr. Osy oraıda, Qamshy tilshisi qaıratkerdiń kózin kórip, birge qyzmet etken áriptesterimen suhbattasty.  

Ózbekáli Jánibek  1931 jyly Shymkent oblysy, Otyrar aýdany, Saryqamys aýylynda dúnıege kelgen. Abaı atyndaǵy Qazaq Memlekettik pedagogıkalyq ınstıtýtynda bilim alyp, 1952-1956 jyldary Shymkent oblysynyń Keles aýdanynda mektepte muǵalim, oqý isiniń meńgerýshisi, Keles aýdandyq komsomol komıtetiniń 1-hatshysy qyzmetin atqardy. Keıinnen 5 jyl Shymkent komsomol komıtetiniń hatshysy boldy. Qazaqstan Jastar odaǵy OK-niń, Qazaqstan Kompartıasy Torǵaı oblystyq komıtetiniń hatshysy, Qazaq KSR mádenıet mınıstriniń orynbasary, mádenıet mınıstri qyzmetine deıin kóterilip,  halqyna qaltqysyz qyzmet etti. Qoǵam qaıratkeriniń "Eho", "Ýaqyt kerýeni", "Jolaıryqta", "Qazaq kıimi", "Ejelgi Otyrar", "Taǵdyr taǵylymy" 1-2-kitap, "1916 jyl" kitaptary jaryq kórgen.