Elimizde jańa oqý jylyna sanaýly kúnder qalsa da, oqýlyq tóńiregindegi shý áli basylmaı tur. Bilim mınıstri Aslan Sárinjipov jyry bitpegen oqýlyqqa qatysty taǵy málimdeme jasady. Bul týraly "Qamshy" aqparattyq portaly  KTK arnasyna silteme jasaı otyryp habarlaıdy.

“Elimizde jyl saıyn tórt synypqa ǵana jańa oqýlyqtar satyp alynady. Iaǵnı, bıyl jergilikti búdjetten aqsha bólinip, 4, 5, 6 jáne 11-synyptarǵa tolyqtaı oqýlyq alyndy. Al, aldyńǵy jyldary basqa tórt synypqa satyp alynǵan bolatyn. Biraq ol kezde qarjy jetispeı kitaptyń birazy alynbaı qaldy. Sondyqtan sol synyptarǵa oqýlyq jetpeı qalýy múmkin”, – deıdi Bilim jáne ǵylym mınıstri Aslan Sárinjipov.

Mınıstr myrza kitap qorynyń az bolýynan oqýlyq  jetpeı qalǵan oqýshylardyń ata-analaryna qarajatty qaltalarynan shyǵaryp, satyp alsyn deıdi. 1 qyrkúıekke deıin elimizdiń mektepterindegi kitaphana qory taǵy jańa oqýlyqtarmen tolyǵatynyna senimdi.  Ári ata-analardy mektepten kitapty qazirden baryp alyp alýǵa shaqyryp otyr.

Budan bólek, mınıstr tómengi synyp oqýshylary úshin bilim ordasyndaǵy túski as týraly da sóz etti. Eske sala ketsek, bıyldan bastap mektepte beriletin tegin as tek jaǵdaıy nashar otbasyndaǵy jáne jarymjan balalar úshin ǵana beriletin bolǵan. Osylardy eskere ketsek, balasy bilim ordasynda oqıtyn ár ata-ananyń  qaltasyna salmaq burynǵydan da edáýir túsetin boldy.

Gúlden Ábdibaqyt