Elbasy Nursultan Nazarbaevtyń

QR Prezıdenti Qasym-Jomart Toqaevtyń

QR UQK tóraǵasy Kárim Másimovtyń

"Otandastar" qorynyń prezıdenti Nurtaı Ábiqaevtyń

Qazaqtardyń dúnıejúzilik qaýymdastyǵy tóraǵasynyń birinshi orynbasary Zaýytbek Turysbekovtyń

Nazaryna

Búgin Qamshy portalyna qabyrǵa qaıystyrarlyq aqparat kelip tústi. 6 jeltoqsanda tańǵa jýyq Almaty halyqaralyq áýejaıyna qonǵan birneshe etnıkalyq qazaqty (Qytaı azamaty) vızasynyń, PSR testtiń teris nátıjesi baryna qaramastan el aýmaǵyna kirgizbeı, sebebin túsindirmesten keri qaıtarǵan. Olar Qytaıdan tikeleı áýe reısi bolmaǵandyqtan, birneshe eldi basyp, sońynda Dýbaı arqyly Qazaqstanǵa jetken. Atalǵan máselege nazar aýdarýlaryńyz úshin osy maqalany jazyp otyrmyz.

Birneshe eldi basyp ótip, "armandaǵan otanyma oraldym ba" degende, ózimizdiń shekara qyzmetiniń mamandary qujattyń durystyǵyna qaramastan qandastarymyzdy tabaldyryqtan attatpaýy ne sumdyq, ne masqara?! Elim, jerim dep kelgen qazaqtyń taǵdyryna arasha bola almaıtyndaı nendeı kúıge tústik? Elbasynyń, memleket basshysynyń "qazaq kóshi toqtamaýy kerek" degen sózderiniń oryndalýy qaıda qaldy? Shekara qyzmetkerleri úshin bul sózderdiń quny kók tıyn bolǵany ma? Ózge ulttardy kemsitip, qorlaǵanymyz emes, biraq qujattary durys, shaqyrý hat bolsa da Qazaqstan shekarasynan nege dál qazaqtar jiberilmeıdi de, ózge ulttar jiberiledi.

Osy máselege nazar aýdaryp, onyń oń sheshilýine yqpal etýlerińizdi suraımyz. Qujaty túgel qazaqty keri qaıtaryp, osy soraqylyqqa jol bergen tulǵalar anyqtalyp, jaýapqa tartylýy kerek dep sanaımyz.

Qamshy portaly aqparatty rastaýǵa, keri qaıtarylǵandar týraly málimetti tıisti organdarǵa usynýǵa daıyn.

Kún jeksenbi bolǵandyqtan resmı oryndar men Almaty áýejaıynan túsinik alý múmkin bolmady. Máselege baılanysty jańalyqtar shyǵyp jatsa, aldaǵy ýaqytta habarlanady.