Áziz Abdýsalam Aýstralıa azamaty. Ulty – uıǵyr. Ol áıelin kórmegenine úsh jyl bolǵan. Al balasymen birinshi ret kezdesti. Balasy 2017 jyly dúnıege kelgende ol Aýstralıada edi. Olar uzaq ýaqyttan keıin Sıdneı qalasynda qaıta qaýyshty.  

Ázizdiń otbasy Qytaımen júrgizilgen dıplomatıalyq kelisim nátıjesinde elden ketýge ruqsat aldy. Onyń áıeli úı qamaqta bolǵan. Onyń da ulty uıǵyr.

Otbasy baqytty sátin fotoǵa túsirip, jelide bólisti. "Raqmet, Aýstralıa. Barshańyzǵa kóp raqmet" dep jazdy Áziz Abdýsalam tvıtterde.

Áziz Aýstralıa azamaty atanǵanyna 10 jyl. Onyń qalyńdyǵy Qytaıda turǵan. Áziz 2016 jyly Qytaıǵa úılený úshin barady. Bir jyldan keıin jumys babymen Aýstralıaǵa oralýǵa májbúr boldy. Ol ýaqytta áıeli onyń vıza alýyn kútip Qytaıda qalǵan. Ázizdiń áıeli sol jyly bosandy, biraq Qytaı bıligi Ázizge vıza berýden bas tartty.

Ýımaıer hanym bosanǵannan keıin Qytaı bıligi ony qamaýǵa aldy. Eki aptadan keıin bosatyp, pasportyn tartyp alyp, úıden shyǵýǵa tyıym saldy. Aýstralıa Qytaıdan olardy elden ketýge ruqsat berý týraly ótinish jibergenimen eki jyl boıy jaýap ala almady.     

Qytaı aqpanda zańdy jeleý etip Áziz ben Ýımaıerdiń otbasyn tirkemedi. Áziz tvıtterda balasy men áıeliniń fotosyn jarıalap, "Men otbasymmen birge bolǵym keledi" dep jazdy.

Aýstralıa dılomatıalyq kelisimniń nátıjesinde Ýımaıer men balasyna Qytaıdan Aýstralıaǵa kelýge ruqsat alyndy.

Áziz Abdýsalamý Aýstralıanyń syrtqy ister departamentine, zańgerler men jýrnalıserge alǵysyn bildirdi.

Adam quqyǵyn qorǵaıtyn uıymdar mıllıondaǵan uıǵyr Qytaı lagerinde otyrǵanyn aıtady. Qytaı adam quqyǵy men bostandyǵyn shektegenin joqqa shyǵaryp, ony dinı ekstremızm men terorızmge qarsy kúres ekenin aıtady. Onyń aldyn alý úshin "saıası saýattandyrý" jumystaryn júrgizip jatqanyn alǵa tartty.  

Qazanda 39 el Qytaı lagerlerindegi jaǵdaıǵa baılanysty narazylyqtaryn bildirgen. Onyń ishinde Aýstralıa, Brıtanıa, AQSH pen birneshe Eýropa elderi bar.