Qazaqstandyqtar máıitke arnalǵan qoraptarǵa salynǵan qaptar qoımasy kórsetilgen vıdeony talqylaýda. Paıdalanýshylardyń pikirinshe, bul ónim COVID-19 vaksınasyn alǵandarǵa arnalǵan. Bul jalǵan, dep habarlady stopfake.kz.

Vıdeony jelige @_TheCoolTwin laqap atymen tirkelgen paıdalanýshy júktegen. Kadrlarda Amazon kompanıasyna tıesili qoıma qyzmetkeri júzdegen qorap salynǵan paletterdi kórsetedi. Olardyń keıbirinde ishinde máıitterge arnalǵan qaptar bar degen jazý jazylǵan. Sodan keıin qoraptardyń bir bóligin FedEx jetkizý qyzmetiniń logotıpi bar júk kóligi alyp ketedi. AQSH-ta qaıtys bolǵandardyń denelerine arnalǵan sómkelerge degen suranystyń artýy vaksınasıamen emes, COVID-19-dan kóz jumý jaǵdaılarynyń artýymen baılanysty. 

"Qazirgi kezde Qazaqstanda segiz óńirde COVID-19 juqtyrǵan naýqastar sany artqany baıqalady. Muny vaksınasıamen baılanystyrý múmkin emes, óıtkeni vaksınasıa elde tek 1 aqpanda bastalady.

COVID-19 qarsy vaksına ólimge ákelýi múmkin degen pikirler negizsiz. Preparattardyń qaýipsizdigi men tıimdiligi klınıkalyq zertteýlermen dáleldengen.

Sondaı-aq vıdeoda da, onyń sıpattamasynda da daıyndalǵan qaptardyń qansha aýrýhanaǵa, qalaǵa jáne elderge arnalǵany aıtylmaǵan. Qoımadan taýarlar álemniń ártúrli núktelerine jiberilýi múmkin, sondyqtan taýarlar sanynyń kóp bolýy oıǵa qonymdy.

Vıdeoda túsirilgen qoıma tıesili Amazon kompanıasynyń resmı ókilderi vıdeoǵa qatysty pikirlerin áli bildirmedi jáne osy taqyryp boıynsha túsinikteme bergen joq" delingen aqparattyq habarlamada.

? - Thousands and thousands of Body Bags filmed by Amazon distribution worker. pic.twitter.com/nIzj4GjLBT

— Harry ?? (@_TheCoolTwin) January 25, 2021