Dogecoin krıptovalútasyna aqsha salyp, qysqa ýaqytta 2 mln dollar tabys tapqan qarapaıym turǵyn óz tájirıbesi týraly aıtty.

Esimin jasyrýdy jón kórgen Los-Andjeles qalasynyń 33 jastaǵy turǵyny óziniń ómir boıy jınaǵan 188 000 dollar aqshasyn osy jyldyń aqpan aıynda Dogecoin-ǵa salǵan.

Sodan beri bul krıptovalúta jyldam qymbattady jáne valútanyń tanymaldyǵy arta tústi. Oǵan qosa, Ilon Mask sıaqty yqpaldy adamdardyń qoldaýy Dogecoin-nyń tez qymbattaýyna sebep boldy.

Degecoin baǵasy 24 saǵat ishinde 200%-dan astam kóterildi, al jeti kúnde 435%-ǵa qymbattady. Qazirgi ýaqytta bul  rekordtyq kórsetkish. 

Nátıjesinde Los-Andjeles turǵyny óziniń alǵashqy ınvestısıasy 2 mıllıon dollarǵa deıin óskenin qýana jarıalady.

Turǵyn jarıalaǵan vıdeoda "Árıne, qubylmalylyq óte joǵary, al men qarjy keńesshisi emespin, bul qarjylyq keńes emes, tek qyzyǵýshylyq. Men qazir ózimdi keremet sezinemin.

Men óte kedeı bolyp óstim, aqsha jetispedi, sondyqtan ómir boıy kúnkóris úshin tynbaı jumys istedim.

Qazirgi ýaqytta da 9-dan 5-ke deıin jumys isteımin jáne men negizinen jalaqyǵa ómir súremin. Mende sondaı-aq 2004 jylǵy eski jáne soǵylǵan Toyota Corolla bar, ol 200 mılden astam júredi, jaqynda iske jaramaı qala ma dep alańdaımyn" deıdi. 

Ol bul jańalyǵyn Reddit habarlamasynda bólisti. Ol veb-saıtta 70 000-ǵa jýyq oń pikirge ıe boldy.

Óziniń aıtýynsha, ol alǵash ret birneshe jyl buryn qor naryǵyna ınvestısıalaı bastaǵan. Jalaqysynyń bir bóligin "tómen baǵalanǵan" dep oılaǵan aksıalarǵa salyp júrgen.

"Alǵashqy jeke tájirıbem Ýoll-Strıttiń burmalanǵanyn jáne júıeniń durys emestigin kórsetip, ınvestısıanyń basqa túrlerin zertteýge májbúr boldym. Men Dogecoin-dy baıqap qaldym jáne bir aptadaı krıpto-valútanyń barlyq oń jáne teris jaqtary boıynsha qarqyndy zertteýler júrgizgennen keıin, bul óte tómen baǵalanǵan dep oıladym. Men barlyq aksıalarymdy sattym, barlyq jınaq shottarymdy aldym jáne sońǵy dollarlarymmen qosyp Dogecoin-ǵa salý týraly sheshim qabyldadym. Men odan buryn eshqashan Dogecoin-ǵa aqsha salǵan emespin" deıdi turǵyn.

Ol Dogecoin-dy satpaıtynyn aıtady.  Kerisinshe, ol qysqa merzimdi kirister salyǵyn tóleýden aýlaq bolý úshin jáne uzaq merzimdi az salyqty tóleý úshin óziniń ınvestısıalaryn kem degende bir jyl ustamaq. Sodan keıin, 10 paıyzdy shyǵarýdy josparlap otyr.

Ol sonymen qatar YouTube-te "Dogecoin Millionaire" arnasyn ashyp, osy attas veb-saıt arqyly taýar satýdy josparlap otyrǵanyn aıtady.

"Men ınstıtýsıonaldy ınvestor emespin. Meniń klıentterim joq jáne men tólemder men komısıalar boıynsha jeke ınvestısıalyq keńester bermeımin. Men jeke qyzyǵýshy ǵana adammyn. Dogecoin-ǵa salǵan ınvestısıalarym men áleýmettik jelilerdegi jazbalarym meniń jeke zertteýim men taldaýyma negizdelgen" deıdi ol.

Degenmen, keıbir sarapshylar krıptovalúta baǵasynyń qubylmalylyǵyna alańdaýshylyq bildirdi.

Freetrade qosymshasyn taldaýshy Devıd Kımberlı CNBC basylymyna bergen suhbatynda adamdar Dogecoin-dy dúrmekke ilesip, "taǵy qymbattaıdy" dep satyp alyp jatqanyn aıtty. 

"Barlyǵy solaı istep jatqan kezde, kópirshik jarylýy múmkin" deıdi ol.

Valúta rekordtyq deńgeıge jetkennen keıin, Dogecoin-nyń negizin qalaýshy Bıllı Markýs óziniń tvıtterdegi paraqshasynda "Jigitter krıptovalúta sıaqty turaqsyz aktıvterge bás tigýdi unatady. Eıforıa - bul  esirtki, biraq sen bilesiń be? Eń bolmaǵanda (osy paıdamen) tólemderińdi tólep, otbasyńdy tamaqtandyryp, sosyn jańbyrly kúnnen saqtaıtyn qoryńa ıe bol" dep jazdy.