Reseılik "Iandeks" kompanıasy qazaqstandyq "G-Taxi" kompanıanyń patentin buzǵany týraly 19 mamyrda sot sheshimi shyqqan bolatyn. Eger "Iandeks" úkimdi ózgerte almasa, onda reseılik kompanıa budan bylaı Qazaqstanda jumys isteı almaıdy.

Bir qyzyǵy, osy kezde qytaılyq "Didi Chuxing" taksı kompanıasy Qazaqstan naryǵyn jaýlaýǵa daıyn tur. "Didi Chuxing" paıdalanýshylar sany boıynsha álemdegi eń iri onlaın-kólik platformasy, jaqyn arada Qazaqstanda jumys isteı bastaıdy. "Qytaılyq kompanıanyń naryqty jaýlap alatyn áleýeti bar" deıdi Eurasianet.org basylymy.

Degenmen "Iandeks" kompanıasy sot úkiminiń qytaılyq kompanıaǵa qatysy bar, joǵy týraly eshqandaı málimdeme jasaǵan joq.

Qytaı naryǵynda basym orynda turatyn kompanıa onnan astam elde, sonyń ishinde Reseıde belsendi jumys isteıdi. Ol ótken jyly Qazan qalasynda jumys isteı bastaǵan jáne qyzmetterin basqa qalalarda da jyldam  qarqynmen ashyp jatyr.