Almaty. Ótken demalysta FISU-dyń bas hatshysy Erık Seıntrond Almaty qalasynyń ákimi Baýyrjan Baıbekpen kezdesti. Bul týraly «Qamshy» portaly eurosport-qa silteme jasaı otyryp habarlaıdy. Jaqynda taǵaıyndalǵan ákimmen aldaǵy is-saparǵa baılanysty jumystardy retteý úshin FISU aldyn ala kelissózder júrgizip alǵandy qup kórse kerek. FISU-dyń tehnıkalyq delegattary 12-15 qazan aralyǵynda Almatyda bolýdy josparlap otyr. Almatyda jańa muz aıdyndary salynyp, sportshylar qalashyǵynyń qurylysy bastalǵanymen, snoýbordıng pen shańǵy frıstaılyna arnalǵan quraldardyń ákelinýi ázirge jospar kúıinde tur.
Qalashyqqa qatysty aıtatyn bolsaq, alǵashqy páterler jaqyn arada jabdyqtalyp, ondaǵy jumys josparlanǵan mezgilinde, 2016 jyldyń 16-maýsymynda aıaqtalatynynda kúmán joq. Taǵy bir jaqsy jańalyq – Ýnıversıada aıaqtalǵan soń sportshylar qalashyǵy Almatydaǵy JOO-daryna stýdenttik turǵyn úı retinde beriletin kórinedi. Ideıa ınısıatorlary qalashyqtyń jeke tulǵalarǵa satylmaıtynyn aıtty.
Sol kún barysynda, FISU-dyń bas hatshysy Qazaqstannyń Mádenıet jáne sport mınıstri Arystanbek Muhammedulymen, sonymen qatar, Bilim jáne ǵylym mınıstri Aslan Sárinjipov myrzamen kezdesti. Olar ortalyq úkimet tarapynyń Almatyda qysqy Ýnıversıada ótkizýge daıyn ekenin rastady. Eki kezdesýde de Saıntrond myrzanyń qasynda Qazaqstandaǵy NUSF Prezıdenti Qaırat Zákirıanov pen bas hatshy Raýshan Qulahmetova boldy.
Aıta keteıik, Kvandjýda ótken FISU Gala festıvalinde profesor Zákirıanov 2013 jylǵy Ýnıversıadada «eń úzdik ýnıversıtet» degen ataqpen marapattalǵan bolatyn.
Nazgúl Nazar
