Ony kózi qaraqty oqyrman men kórermen óte jaqsy tanıdy.Sebebi ol óziniń muń-muqtajyn ǵana emes, ózi quralpy jetimderdiń qoǵamdaǵy qazirgi jaǵdaıy týraly júrgen jerinde sóz etkendi qup kóredi. Osy eldiń azamaty retinde asty  qazynaǵa toly Otanda jetimdik kórgeni úshin qatty ashynady.  Bireý ony  «anasyn sotqa bergen bala» dep atasa, endi bireýler  álgi teledıdarǵa jıi shyǵatyn  Serik emes pe edi dep tanı ketedi. Ol týraly «Qamshy » portaly da  sózdiń tıegin aǵytyp kórgen bolatyn http://old.qamshy.kz/?p=24854.  Almaty qalasyndaǵy turyp jatqan jataqhanasynan shyǵaryp jiberetin bolǵandyqtan, yqpaldy adamdardyń kómegine zárý ekenin aqparat alańyna  kelip aıtyp ketip edi. Sol Serik  Kenjebek redaksıamyzǵa keshe taǵy kelipti. Túri júdeý. Kúzdiń sýyǵy men qoǵamnyń qataldyǵyna ábden qaltyraǵany baıqalady. Jumys tappaı júr eken. Jataqhanasyna aı saıyn 15 myń teńge tólep turyp jatsa kerek. «Janashyr adamdar osy ýaqytqa deıin qaryz berip, bólmemniń aqysyn tólep keldim. Endi elden qashanǵy aqsha ala beremin. Er jigitpin ǵoı. Mańdaı terimmen nan tapqym keledi. Biraq eki qolǵa bir kúrek tabylmaı tur. Joǵarǵy bilimim joq. Sondyqtan qaǵaz «kemirip», pernetaqtanyń túımelerin shertetin jumys izdep júrgen joqpyn. Jigitke adal jumystyń barlyǵy qolaıly ǵoı. Sondyqtan qandaı jumys bolsa da, jasaı beremin. Tek sol jumys tabylmaı tıtyǵymdy shyǵardy»,-deıdi Serik. Osylaısha qazaqtyń bir balasy alyp shahardyń qaı buryshynda  eki qolyna bir kúrek tabylar dep  sabylyp júr. Áleýmettik jelilerde kásip ashyp, jumysyn dóńgeletip jatqan qyz-jigitterdi jıi kóremiz ǵoı. Bálkim, sol azamattardyń Serikke bir septigi tıip qalar. Bala kezinen taǵdyrdyń tepkisin kórgen ulǵa ulttyq janashyrlyq tanytsaq qaıtedi? Ol jumystan bezip, alaqan jaıyp otyrǵan joq. Ol jumys izdep júr. Kóshede qol aıaǵy balǵadaı bolsa da alaqan jaıýmen kúneltip júrgenderge de janashyrlyq tanytyp jatamyz ǵoı. Oǵan qaraǵanda Seriktiń talpynysy bar. Endi qalyptasyp kele jatqan azamat synyp ketpeýi tıis dep esepteımin. Siz qalaı oılaısyz?

Aınur Tóleý