Ulttyq ekonomıka mınıstri Áset Erǵalıev azyq-túlik qymbatshylyǵyna baılanysty pikir bildirdi.  

– Baǵanyń ósýine qatysty aıtatyn bolsam, maýsymdyq ózgerister bolýy múmkin. Jeltoqsan aıynda mereke kúnderi azyq-túlik baǵasy kóteriletinin bárimiz jaqsy bilemiz. Biz bárimiz jańa jylǵa daıyndalyp jatyrmyz, baǵalar únemi ósip keledi. Bárinen buryn azyq-túlik qymbattaıdy, –  dedi Áset Erǵalıev májilis kýlýarynda.

Sondaı-aq mınıstr qazir dúkende nan men kartop qansha turatynyn jáne ózi azyq-túlikke aıyna qansha jumsaıtynyn aıtty. 

– Nan 130 teńge turady, túrine baılanysty. Kartop 425 teńge shamasynda. Azyq-túlikke aıyna 50-60 myń teńge jumsaımyz. Barlyq otbasylar sıaqty qant, un, sút alamyz, –  dedi ol.

Qazaqstanda qymbatshylyq saldarynan tapqan tabysty tutyný taýarlaryna jumsaý kórsetkishi aldyńǵy jyldarǵa qaraǵanda edáýir ósken.

Qamshy tilshisine turǵyndar aılyǵynyń kóp bóligin azyq-túlikke jumsaıtynyn, qymbatshylyq saldarynan aılyǵy jetpeıtinin aıtqan.