18 qarasha kúni Mańǵystaý oblysynyń ákimi Nurlan Noǵaev eki kúndik jumys sapary barysynda Jańaózen qalasyna qarasty eldi-mekenderdiń áleýmettik-ekonomıkalyq damý jaǵdaıymen tanysty, dep habarlaıdy Mańǵystaý oblysy ákiminiń baspasóz qyzmeti.
İs-sapardyń alǵashqy kúni oblys basshysy Jańaózen qalasyna qarasty Teńge, Qyzylsaı, Kendirli aýyldaryndaǵy áleýmettik nysandardy aralap, búgingi jaǵdaıyn kórdi.
Qalany damytýdyń 2025 jylǵa deıingi keshendi jospary aıasynda birqatar medısınalyq nysan boı kóterýde. Osy jyldyń qyrkúıek aıynda Qyzylsaı aýylynda dárigerlik ambýlatorıa qoldanysqa berilse, jyl sońyna deıin Jańaózen qalasynda 50 oryndyq ozyq úlgidegi medısınalyq ortalyq ashylady dep josparlanyp otyr. Nurlan Noǵaev emhananyń qurylysymen tanysyp, zamanaýı medısınalyq qural-jabdyqtarmen jumys isteıtin mamandardy qazirden daıyndaý kerektigin aıtty.
Jańaózen qalasynda mektepke degen suranys jyl saıyn artyp keledi. 2020 jyly – 33,6 myń oqýshy, 2021 jyly – 34,2 oqýshy bilim alsa, 2025 jyly qala mektepterinde oqıtyn oqýshylardyń sany 37 myńǵa artady dep josparlanýda. Mektepterdegi oryn tapshylyǵyn joıý maqsatynda «Shańyraq» shaǵynaýdanynda 1500 orynǵa arnalǵan smart mektep salý kózdelip otyr. Mektepte balalardyń damýyna jan-jaqty jaǵdaı jasalady, atap aıtqanda telestýdıa, oıyn bólmeleri, shyǵarmashylyq zertteýler úshin 3D prınteri, robototehnıka kabınetteri, temir men aǵash óńdeý sheberhanalary jumys isteıtin bolady. Joba quny 4,8 mlrd. teńgenń quraıdy.
Qala mektepterinde maman tapshylyǵy bar. Búginde mektepterde matematıka, orys tili, aǵylshyn tili jáne tarıh pániniń muǵalimderi jetispeıdi. Oblys ákimi muǵalimdermen tildesý barysynda keı mektepterde «Dıplommen aýylǵa» memlekettik baǵdarlamasymen kelgen mamandardyń úıli bolǵanymen, kóterme qarajatty almaǵany belgili boldy. Nurlan Noǵaev jaýapty azamattarǵa máseleniń anyq-qanyǵyna jetýdi tapsyrdy.
- Bul baǵdarlama elimizdegi jas mamandardy áleýmettik qoldaý jáne kadr tapshylyǵyn tómendetýge baǵyttalǵan. Osynyń arqasynda biz mektepterdi qajetti mamandarmen qamtyp otyrmyz. Bul baǵdarlamanyń árbir qatysýshysyna tıisti kóterme járdemaqy tólenip, baǵdarlamadaǵy jeńildikter men negizgi sharttardy túsindirý kerek. Ulttyń bolashaǵyna yqpal etetin ustazdar. Sondyqtan da pedagogtardy qoldaý bizdiń negizgi maqsatymyz bolyp qalady, dedi Nurlan Noǵaev.
Aımaq basshysy Kendirli aýylynda salynyp jatqan 300 oryndyq mádenıet úıiniń qurylysymen de tanysty. Joba «Aýyl - el besigi» memlekettik baǵdarlamasy boıynsha júzege asýda. Munda kórermen zaly, 14 myń kitap qory saqtalatyn kitaphana ornalasady. Nurlan Noǵaev qurylystyń qarqynyn baqylaýda ustaýdy tapsyrdy.
Jumys sapary barysynda oblys ákimi Qazaq gaz óńdeý zaýytynyń jumysymen tanysty. Aımaq suıytylǵan gazdy paıdalanatyn iri tutynýshylardyń biri. Oblys avtokólikteriniń 90 paıyzdan astamy suıytylǵan gazdy paıdalanady.
Óńirge negizgi gaz jetkizýshi - Qazaq gaz óńdeý zaýyty (QazGÓZ). Onyń tehnıkalyq qurylǵylary 90 paıyzǵa tozǵan. Zaýyttyń apattyq jaǵdaıda jıi toqtaýy halyqty otynsyz qaldyrýy múmkin. Osyǵan oraı, QazGÓZ bazasynda jańa gaz óńdeý zaýytyn salý máselesiniń keshiktirilýi ekonomıkalyq qana emes, áleýmettik qaýipti de tóndirýi yqtımal. Osyǵan baılanysty, oblys ákimi jaýapty tulǵalarǵa atalǵan máseleni únemi baqylaýda ustaýdy tapsyrdy.
