Ulybrıtanıa hanzadasy Endrú "jıyrma jyldan astam ýaqyt buryn jynystyq zorlyq-zombylyq kórsetti" degen Vırdjınıa Djýffreniń aıyptaýyn joqqa shyǵaryp, AQSH qazylar alqasynan sot talqylaýyn surady.

Iork gersogy Hanzada Endrú – brıtan koróldik otbasynyń múshesi. Patshaıym Elızaveta II men hanzada Fılıpptiń úshinshi balasy jáne brıtan taǵy muragerleriniń biri.

38 jastaǵy Djýffre ótken tamyzda Iork gersogyn sotqa bergen. Ol qarjyger jáne seksýaldyq qylmysker Djeffrı Epshteındi "meni saýdalap, uryp-soqty" dep aıyptaǵan.

AQSH-tyń Manhettendegi okrýgtik sotyna bergen aryzynda 61 jastaǵy Endrú 1999 jyldar shamasynda Epshteınmen kezdeskenin moıyndady, biraq Djýffrdiń oǵan "jynystyq zorlyq-zombylyq jasady" degen málimdemesin joqqa shyǵardy.

"Hanzada Endrú osy arqyly shaǵymda kórsetilgen áreketter boıynsha alqabılerdiń sot talqylaýyn talap etedi" dep jazdy onyń advokaty sársenbi kúngi ótinishinde.

Hanzada qylmystyq jaýapkershilikke tartylǵan joq. Ol koróldik mindetterinen bas tartýǵa májbúr etken aıyptaýlardy joqqa shyǵarady.

Osy aıdyń basynda brıtan koróldik otbasy Endrúdi áskerı rólderi men koróldik qamqorlyǵynan aıyrǵan. Budan bylaı onyń "Koróldik Mártebesi" bolmaıtyny aıtyldy.

13 qańtardaǵy Býkıngem saraıynyń málimdemesinde "Iork gersogy eshqandaı qoǵamdyq mindetter atqarmaıdy jáne bul isti ózin jeke azamat retinde qorǵaıdy" delingen.

Djúffre 2001 jyly naýryzda Gısleın Maksvelldiń Londondaǵy úıinde Endrúdiń oǵan jynystyq zorlyq-zombylyq jasaǵanyn aıtady. Ótken aıdyń sońynda AQSH-tyń qazylar alqasy Maksvelldi jasóspirim qyzdarǵa jynystyq zorlyq-zombylyq jasaýda Epshteınge kómekteskeni úshin kináli dep tapty.

Hanzadanyń advokattary buǵan deıin Djýffreniń sot isin "negizsiz" dep atap, ony qosymsha ótemaqy surady dep aıyptaǵan. Djýffre Epshteınden 2009 jylǵy azamattyq kelisimde 500 000 dollar alǵan.

AQSH okrýginiń sýdıasy Lúıs Kaplan sot prosesi 2022 jyldyń qyrkúıegi men jeltoqsany aralyǵynda bastalýy múmkin ekenin aıtty. Eger Djýffre sotta jeńiske jetse, Endrú keltirilgen shyǵyndy óteýi múmkin. Djýffreniń suraǵan somasy belgisiz.