Bireýiń qyzben júrgenińdi, gýláıt salǵanyńdy, myqynyńnan ustaǵanyńdy jazyp júrsiń, endi biriń ne anda, ne mynda joq, qoıannan kóz jazyp qalǵan tazydaı, arsalańdap júrsiń. Taǵy bireýiń kóringenge «Jalpaqsheshe» kóringeli túlkishe quıryǵyńdy bulańdatyp júrsiń. Endi birińniń orysty qazaqqa, qazaqty orysqa shaǵystyryp senim almaq, aqyn atalmaq oıyń bar. Taǵy bireýiń oıyn jasyryp, boıyn jasyryp, jat eldiń jazýshylaryn aýdaryp talshyq etýdesiń. Senderde murat bar ma? Baqyt bar ma? Júrek bar ma? Búgin - ıdealıs, erteń - materıalıs, búgin - realıs, erteń - sımvolıs, búrsigúni - fýtýrıs, taǵy birdeme «ıst», áıtpese árqaısysynan bir shókim. Aqyndyqty, jazýshylyqty saýysqanǵa aıyrbastap, neden munsha adastyńdar? Kúndik kúnińe, óshti qasty kegińe, álde kúnshildigińe bola eldiń aınasy - ádebıetti urys keriske, boqaýyzǵa aınaldyrdyńdar. Keleshekten uıalsańdarshy! Kúıip kettim ǵoı, shydaı almadym ǵoı! Aıtpaıyn desem de qoımadyńdar ǵoı, túge azyp týǵan mundarlar! 

Júsipbek Aımaýytov , «Eles» dep atalytyn áńgimesinen úzindi