Almaty ákimi Erbolat Dosaev halyqpen kezdesý barysynda Coca-Cola jarnamasy úshin óshirilgen qar barysy mýralyna qatysty jaqynda bolǵan janjalǵa pikir bildirdi.

Dosaev mýraldarǵa resmı mártebe berilmese, másele sheshilmeıtinin qadap aıtty.

Qazirgi ýaqytta Almaty qalasynyń jobalyq kodeksi pysyqtalýda, onda mýraldar bólinip, jarnamany ornalastyrý men ózgertýge qatysty máselelerdi sáýlet jáne qala qurylysy basqarmasymen kelisý qajettigi kórsetilgen.

«Ókinishke qaraı, Coca-cola jarnamasyna qatysty oqıǵa MIB jumysynyń saldarynan boldy - ókilder kelisimge qol qoıyp, qosymsha 1,5-2 mıllıon teńge alǵan. Al kompanıa búıir qabyrǵaǵa «bul bizdiki» dep jarnama ilip qoıǵan . Jáne bul - durys, óıtkeni búgingi mýraldarmen ne isteýge bolatyny týraly naqty erejeler joq. Qalada ártúrli qabyrǵa sýretteri bar: qorǵaýdy qajet etetin óner týyndylary jáne ártúrli sebeptermen bir ýaqytta paıda bolǵandary da jetedi. Olar qalanyń sáni emes. Óńirler boıynsha qabyrǵa sýretteriniń tizimin jasap, sheshemiz. Mýraldardy zańdastyrý kerek. Qalamyzdaǵy ǵımarattardyń qańyrap bos turǵan sur qabyrǵalaryn toltyrý úshin biz sýretshilermen jumys isteımiz», - dedi Doasev.

Eske salaıyq, buǵan deıin almatylyqtar qar barysy bar qabyrǵa sýretin óshirgeni úshin narazy bolǵan edi. Onyń ornyna Coca-Cola jarnamasy paıda bolyp, áleýmettik jelilerde syn týdyrdy.

Keıinirek Coca-Cola kompanıasy jarnama úshin basqa úıdiń qabyrǵasy tańdalǵanyn, biraq turǵyndardan qajetti kelisimdi alý múmkin bolmaǵanyn aıtty.

Sodan keıin balama retinde Menshik ıeleri birlestigi ruqsatymen qar barysy bar qabyrǵa usynylǵan.