Keıingi kezderi tamyryn tereńge jaıyp, jahanda ataǵy máshhúr bolyp júrgen sporttyń túri – erejesiz jekpe-jek. Tarmaǵy taraptanyp san qıly bólimderge de bólinip úlgergen. M-1,MMA, UFS, Altyburysh, Segizburysh taǵysyn taǵylary.

         Atalǵan sport túrine alty aı boıy attan túspegen bahadúr babanyń búgingi urpaǵy, qazaqtan shyqqan sportshylardyń úlesi bar ma?  Álbette bar. Kóshten qalar kúıimiz joq. Ásirese, sátti de shytyrmanǵa toly tóbelestiń kókesin «Alash Praıd» komandasy kórsetip júr búginde. Aýyz toltyryp aıtar jetistigimiz de jeterlik. Kúni keshe ǵana otandasymyz Ermek ál-Asad Tlaýov MMA-den PRIME SELECTION tarmaǵy boıynsha álem chempıony bolyp oraldy. Krasnodar qalasynda ótken baıqaýdan chempıondyq belbeýmen oralǵan otandasymyzdan alǵashqy bolyp suhbat alý mártebesi «Qamshy» portalyna buıyrdy degendi qýana jetkizemiz. Qysqa da nusqa, qyzyǵy men shyjyǵyna toly áńgimemizdi nazarlaryńyzǵa usynamyz. Suqbatty bastamas buryn bir aýyz kirispe aıtsaq. Ermek Tlaýovpen júzbe-júz kezdeskendegi áser erekshe boldy. MMA-den chempıon bolý ońaı dúnıe emes. Biraq qansha bıigine kóterilse de Ermektiń aqkóńildiligi men eleń minezi tań qaldyrdy. Muny sportshyǵa qarata aıtý qıyn. Biraq bul jigit asa meıirimdi eken. Esh qospasyz, boıamasyz shyndyq. Endeshe kettik.

Ermek «ál-Asad»  Tlaýov: «Jeti jyl boıy sporttan alshaq júrdim»

• Ereke, armysyz. Júldeli oralýyńyzben shyn júrekten quttyqtaımyz. Qanjyǵańyz bosamasyn.
• Raqmet (kúlip hám qysyla sóıledi)
• Ereke, áńgimemizdi tótesinen bastasaq. Sportqa qalaı keldińiz?
• Sportqa bala kúnimizde keldik, endi. Anyqtaı ketsem, 14 jasymda kúreske qatystym. Sodan 20 jasyma deıin qatysyp júrdim. El chempıony boldym. Birneshe jarystarda júldeli oralyp júrdim. Biraq keıin jumys isteý kerek boldy, artynsha otaý qurdym. Sondyqtan sporttan ketip qalýǵa týra keldi.
• Sonda qansha ýaqtyqa tastap kettińiz?
• Sportqa kelý bar, ketý joq degen ras eken. Keıin sportty tastap ketsem de, janym sony qalap júrdi. Iý-týb jelisinen erejesiz jekpe-jekterdi baqylap júrdim. Qyzyǵyp júrip 7 jyl ýaqyttyń qalaı ótip ketkenin baıqamaı qalyppyn. Sodan, birde osy ózimdi teksereıinshi degen oı keldi. Sodan Astanada áýesqoılar arasyndaǵy  erejesiz jekpe-jekke qatysyp kórdim. Alǵashqy jekpe-jekti ýaqytynan buryn aıaqtadym.
• Júrip-júrip tóbeleske aralasyp ketkenińizge úıdegi jeńgeı qalaı qarady? Qarsylyq bildirip, qaıtesiń degendeı syńaı kórsetpedi me?
• (bir kúlip aldy) Jo-joq. Ol meni tolyqtaı qoldady. Qudaıǵa shúkir áli de qoldap keledi.
• Ereke, kelesi suraq. Bizdiń bilýimizshe siz qazir «Alash Praıd» quramynda júrsiz. Eger siz 7 jyl boıy sportty tastap ketseńiz, sporttyq formańyz ketti, nobaı ketti degendeı. «Alash Praıd-qa» qalaı keldińiz?
• Jańa aıtyp ótkendeı Iý-týb jelisi arqyly «Alash Praıd» komandasynyń tóbelesterin kórip kóp qyzyqtym. Sodan bir kúni Tarazdan Almatyǵa biraq tarttym. Jigitterden «Alashtyń»  daıyndalatyn zalyn surap sonda keldim. Sodan áýesqoılar arasynda 4 tóbeles ótkizip, tórteýinde ýaqytynan buryn aıaqtatdym. Ózimdi MMA-da kórgim keledi dedim. Alǵashynda Asqat Erbolatov aǵamyz: «Bul basqa deńgeı. Munda kásipqoı kúreskerler ǵana jınalady»,- dedi. Biraq degenimnen qaıtpaıtynymdy kórgen soń, keıin jarystarǵa shaqyramyz dedi. Keıin Shymkent qalasyndaǵy bir týrnırge shaqyrdy. Alǵashynda Taldyqorǵandy bir jigitpen tekserý úshin shyǵardy. Ony 4-shi sekýndta teýip, nokaýtqa jiberdim. Bapkerler muny kezdeısoqtyq dep kesti ǵoı deımin. Ekinshi jekpe-jek jaqsy ataǵy shyǵyp qalǵan, juldyz bolyp júrgen, AQSH-ta jaqsy kórsetkish kórsetip júrgen Narıman Musaevpen shyqtym. Jekpe-jek 6 sekýndta toqtady. Taǵyda nokaýt. Bul joly uryp qulattym. Sodan bastaldy «Alash Praıdqa» qosylýym. Artynsha «Bıtva pod Moskvoı» degen jarysqa qatysyp jeńiske jettim.
• Talpynǵan adamǵa, armanyna sengen adamaǵa alynbaıtyn qamal joq deısiz ǵoı?
• Dál solaı.
• Kásipqoı mansabyńyzdaǵy rekordyńyz qandaı?
• Búginge deıin 14 jekpe-jek ótkizdim. Sonyń 12-sin jeńip, 2 –eýinen jeńildim.
•  Jeńilisti qalaı qabyldadyńyz?
• Tik turyp. Esh moıymadym. Kerisinshe jańa motıvasıa berip otyrdy!
• Siz chempıondyq beldikti alyp jatqanda, Qazaq handyǵynyń 550 jyldyǵy toılanyp jatty...
• Iá, dál solaı. Aıta ketkim keletini mynada, men jeńisimdi Qazaq handyǵynyń 550 jyldyǵyna tartý etemin. Jalpy osy jeńis jolynda qoldaý kórsetken bapkerlerime, sparrıng-seriktesterimizge kóp-kóp rahmet!
• Rıasyz áńgimeńiz úshin  alǵys aıtsam dep edim.
• Sizge de raqmet!

Aıan MEIRASH