20 qyrkúıekte Qarjy mınıstrligi shetelden qarjylandyrylatyn elimizdegi jeke jáne zańdy tulǵalardyń tizimin jarıalap jiberdi. Tipti JSN-derin ashyq kórsetip, jaıyp saldy.

Sóıtsek, bizdiń bıliktiń "Sheteldik agentter" dep tanyǵany belgili jýrnalıser, tanymal tulǵalar, BAQ-tar, qoǵamdyq qorlar men sheteldik kompanıalar eken. Bul tizimge uzyn-yrǵasy 240 uıym men tulǵany qosyp qoıypty.

"Kótek kórgenin isteıdi" demekshi, Reseıdiń "ınoagent týraly" zańyn Qazaqstan bıligi de qajetsine bastaǵan kún týdy.

Reseıde bul zań Kremldi synaıtyndarǵa qarsy qoldanylyp, sóz bostandyǵy men oı erkindigin tikeleı shekteıdi.

Memlekettik organdar "Reseımen salystyrmaıyq, bizdiń maqsatymyz basqa" dep myń jerden moıyndamaı otyrsa da, bul tizimniń túpki maqsaty erkin qazaqtyń aýzyna qaqpaq qoıý ekeni túsinikti.

Qyzyq. Qazaqstannyń azamattyq qoǵamyn damytýǵa, Qazaqstandaǵy adam quqyǵy men demokratıany ilgeriletýge, aqyr aıaǵy qazaq qoǵamynda aqıqattyń aıtylýy úshin aqshany da, granttardy sheteldiń damyǵan elderi bóledi.

Esesine qazaqtyń óz elinde jýyrda "blogerler jarnamadan salyq tóleýi kerek" degen jeleýmen, "jalǵan aqparat taratýshylardy" jazalaıtyn taǵy bir zań kúshine endi. Ákimder men mınıstrlerdi qyzmetinen alýdy talap etip petısıa jazýǵa tyıym salatyn zań jobasy maquldandy. Endi mine, "sheteldik agentter" degen tizim paıda boldy.

"Ádiletti Qazaqstan" baspasóz ben úkimettik emes uıymdardy jónge salýǵa jaqsylap kirisken syńaıly.