Baspaldaqtan qulaǵan balanyń bas súıegi zaqymdanyp, mıy shaıqalǵan. Baspaldaqtyń bir jaǵynda qorshaý bolmaǵan. Sondyqtan ata-ana qaýipsizdik sharalaryn saqtamaǵan basshylardyń jazaǵa tartylýyn talap etýde. Mektep dırektory oqýshyny synyptasy ıterip jibergenin aıtady.

Oqıǵa  18 qyrkúıek kúni Astanadaǵy №14-mektepte bolǵan. Beınebaqylaý kamerasyna Tamırlan Kárimqulovtyń ekinshi qabattyń baspaldaǵynan qulaǵan sáti jazylyp qalǵan. Segiz jastaǵy jetkinshek osy baspaldaq pen qabyrǵa arasyndaǵy ashyq jerden qulap ketken.

“Basy bes jerden synǵan. Aıtýlarynsha, kózdiń ústi synǵan. Kózdiń artyna súıek turyp qalǵan. Búgin kózdiń jany da synǵan deıdi. Munda jóndeý jumysy jasalǵan kezde nege teksermegen?. Bir de bir baspaldaqta qorshaý joq. Keshe qulaǵannan keıin baryp istedi", – dedi Tamırlan Kárimqulovtyń ákesi Bekjan Qojamqulov.

Tamırlan qulaǵan sátte muǵalimder jedel járdem shaqyrǵan. Alaıda medısına qyzmetkerleri ýaqytynda kelmepti.

Jedel járdem 17:10-da shaqyrylǵan. Ol altydan asa keldi. Ákimdikke habarlasyp, shaqyrttym. Sodan keıin ǵana keldi, áıtpese keler túri joq. Balamdy emdetý úshin qanshama qarajat kerek bilmeımin”, – deıdi balanyń ákesi. 

Mektep dırektory osy jaǵdaıdan keıin ǵana qaýipti baspaldaqtardyń bir jaǵy qorshalǵanyn rastady. Aıtýynsha, tótenshe jaǵdaılar departamentiniń ókilderi buǵan deıin birneshe ret bilim uıasy ǵımaratyna tekserý júrgizgen. Mamandar ashyq turǵan ishki satylar bala ómirine qaýipsiz degen qorytyndy shyǵarǵan eken.

“Júıeli túrde TJD, SES tarapynan tekserýler júrgiziledi. Bul baspaldaqtar boıynsha eskertý bolmady. 2 "D" synyp oqýshylaryn muǵalimi jetektep, ınformatıka sabaǵyna ekinshi qabatqa kóterilip bara jatqan kezde synyptastar bir-birimen oınap, bir synyptasy ıterip jibergen”, – dedi Astana qalasy №14 mektep-gımnazıasynyń dırektory Dıdar Baıtasov. 

Dárigerler Tamırlannyń densaýlyǵy áli de ortasha aýyr jaǵdaıda dep baǵalap otyr. Jetkinshek esin jıǵan.

Buǵan baılanysty polıseıler "balalardyń ómiri men densaýlyǵynyń qaýipsizdigin qamtamasyz etý jónindegi mindetterdi oryndamaý" baby boıynsha qylmystyq is qozǵaǵan. Tamırlandy baspaldaqtan ıterip jiberdi degen derek tekserilip jatyr.

Eske sala keteıik,  Astananyń №14 mektep-gımnazıasynda jazataıym oqıǵa bolyp, oqýshylardyń biri baspaldaqtan qulap ketken. Astananyń bilim basqarmasy 25 qyrkúıek kúni oqýshyny synyptasy ıterip jibergenin málimdegen edi.