Parlament májilisinde birden eki depýtat Islam dinin jamylǵan jat aǵym jaıynda dabyl qaqty.

Ermurat Bapı óziniń depýtattyq saýalynda teris dinı úrdistiń saıası sıpat alyp bara jatqanynan alańdaıtynyn jetkizdi. Onyń sózinshe, halyqtyń kemshin dinı bilim-tanymyn paıdalanǵan teris dinı top jantalasyp, qoǵamǵa jalǵan rýhanı qundylyqtar men bóten dástúrlerdi sińirý qamyn jasaýda.

– Qoǵamdy arabtyq-ýahabtyq dinı ustanym negizde bólshekteýge baǵyttalǵan bul áreketterge bizder, depýtattar jaıbaraqat qarap otyra almaımyz! Biz myńjyldyq dombyrany haram qylýǵa jol bermeımiz! Bul áreketter eldiń ulttyq qundylyqtar júıesi men rýhanı negizine jasalyp jatqan shabýyl dep túsiný kerek!

Atyraý, Aqtóbe, Mańǵystaý, Ulytaý, Almaty óńirinde ıslamdyq sekta etek jaıyp barady. Shaǵyn bıznes, ásirese bazar saýdasy tóńiregin ýahabshylar, salafızm ıdeıasyna tabynýshylar basyp barady. Jasyratyny joq, memlekettik bıliktiń óz ishinde de ýahabızm men jat aǵymdardy nasıhattaýdy qoldaıtyn joǵary laýazymdy memlekettik qyzmetkerler bar degen derek meniń qulaǵyma jetti. Eger osy sóz qańqý emes, naqty jaǵdaı osylaı bolsa, onda bizdiń táýelsiz memlekettigimizge shynynda da qater tóngeni.

«Eski Qazaqstan» bul qaterdiń shoǵyn úrleı túsýde. Qazaqtyń ulttyq damýyna qaterli ýahabızm ıdeıasyn halyqtyń biraz bóligine sińirgen «eski rejım» eldi áleýmettik toptarǵa bólý arqyly óziniń jeke dara bıligin meıilinshe uzaq saqtaýdy kóksedi. Onyń qandy nátıjesin Qańtar oqıǵasy kezinde kórdik. Úkimet qalyptasqan kúrdeli jaǵdaıdy túısinip otyr ma? Qoǵamnyń dinı negizde bólshektený qaýpine qarsy is-qımyl jospary bar ma? 12 jyl buryn – 2011 jyldyń 11 qazanynda qabyldanǵan «Dinı qyzmet jáne dinı birlestikter týraly» zańǵa tıisti ózgerister men tolyqtyrýlar engizýdiń qoǵamdyq qajettiligin kóteretin kez kelgen joq pa? Biz barlyq kúsh-jigerimizdi biriktirip, ult birligi men memlekettiń turaqty damý jaǵdaıyn saqtaýǵa Úkimet pen Parlament múddeli bolýy kerek dep esepteımiz, – dedi Ermurat Bapı.

Dinı radıkalızmge qatań tyıym salatyn kez jetti dep, «Aq jol» fraksıasy músheleriniń atynan depýtat Qazybek Isa da premer-mınıstr men UQK komıteti tóraǵasyna saýal tastady:

2011 jyly bul máseleni barlyq mınıstrlik pen Bas prokýratýra men Joǵary sot ta qoldaǵanda tek Ulttyq qaýipsizdik komıteti qarsy shyǵyp, osy tyıym salý zańǵa enbeı qaldy. "Dini bar da, ulty joq, saqaly bar da, murty joq, El túbine sol jeter" dep, bir ǵasyr buryn jazǵan Máshhúr Júsip áýlıe shynynda kóregen eken. Murty joq, tek saqaly sapsıyp turǵan Han Abylaıdy, Áıteke, Tóle, Qazybek bılerdi, Er Mahambet, Uly Abaı, Jambyl, Álıhandardy elestete alamyz ba?! Shetelde oqyp kelgen teris aǵymdy «ustazdar» osy ulylarymyzdan artyq, aqyly asyp, bilimi tasyp kelgender me?

Qazir án áleminde, aıtysta, sportta da taırańdap júrgen jat aǵymnyń ókilderi dindi jamylyp alyp, áriptesteri men ánsúıer, jankúıerlerine óz «salttaryn» kirgizip jatyr.

Ótken 30 jyldyq teris saıasat qazaqtyń «nur» degen jalyndy sózin jaǵymsyz sózge aınaldyrsa, teris dinı aǵymdar tipti, eń qymbat, ana degen aıaýly atpen qatar atalatyn «Sheshe» degen qasterli ataýǵa qara kúıe jaǵyp, «ustaz» degen ulaǵatty uǵymnyń mánin qurtty.

Dinı teris aǵymdaǵylar eldi ekige bólip, myltyqsyz-aq myńdaǵan jastarymyzdy qazaqtyń qatarynan shyǵaryp qana qoımaı, ultty joıý úshin elge qarsy qaýipti kúshterge aınaldyryp jatyr. Dinge, tilge, jerge qarsy elbuzar teris aǵymdardyń bárine zańmen tosqaýyl qoıylýy tıis!

El úshin eń qymbat ultqa, adam úshin eń aıaýly áke-sheshege, qazaqqa eń adal dombyraǵa qarsy haram pıǵyldylardyń erkin tarap jatqan El túbine jeter vırýsyn shuǵyl zańmen toqtatatyn kez jetti! Budan keıin kesh bolady, – dedi Qazybek Isa.