Qazaqstanda 12 qazanda "Jel toqtaǵan jer" degen fılm prokatqa shyǵýy tıis bolǵan.

Biraq ol kartınanyń premerasy ótkennen keıin, bul týyndyny úlken ekranǵa shyǵarý qarasha aıyna shegerilipti.

Jalpy, "qarashaǵa qalsyn" dep keıinge shegerile salynǵan, anyǵynda kórermenge naqty qashan jol tartatyny múldem belgisiz.

Aldyn ala kórsetilimge qatysqan jurt bul fılmnen jylap shyqqan.

Endi bul týyndy ekranǵa shyqpaı, sol kúıi kórmeı qalýymyz da múmkin.

Bul fılmde bizdiń babalarymyzdyń basynan ótken aýyr oqıǵalardyń biri baıandalady.

Ótken ǵasyrdyń 20-30-jyldary keńes úkimeti "ujymdastyrý" syltaýymen uıymdastyrǵan genosıd saldarynan qazaq halqynyń basym bóligi ashtan qyryldy.

Bul kezeń qazaq halqynyń tarıhynda "asharshylyq" degen atpen máńgilik jazylyp qaldy.

Fılm eki uldyń anasy, Jupar esimdi jas kelinshektiń taǵdyryn kórsetedi. Kúıeýi Asandy KSRO ishki ister halyq komısarıaty tutqyndap, ujymdastyrý aıasynda maly tárkilenedi. 

Aýyl halqy ashtyqtan qashyp, tarap ketedi. Balalarmen birge Jupar da amalsyz jerinen ketýge májbúr. Jolda ol túrli adamdardy kezdestiredi: úısiz, ash qalǵan burynǵy sheneýnikti, kúlli qazaqtyń aqyryn boljaıtyn jyndy kempirdi jáne bir úzim nan úshin bárine kónetin ash, sharasyz qazaqty. 

Aqyrynda Jupardyń bar tamaǵy taýsylyp, endi ol tapqanyn álsiregen eki balanyń birine ǵana berýge májbúr. Qaı balamdy aman alyp qalaıyn degen aýyr tańdaý...

Qamshy.kz "Jel toqtaǵan jer" fılminiń prokaty ne sebepti keıinge shegerilgenin anyqtaý úshin fılmniń avtorlaryna suraý jiberdi.