Al sonda muny qalaı túsinýge bolady?

Álqıssadan bastasaq, búgin Úkimette ótken baspasóz máslıhaty barysynda Ulttyq ekonomıka mınıstri Nurlan Baıbazarov BJZQ aqshasyna vagondar satyp alynǵanyn rastady. Naqtyraq aıtqanda, jobanyń birinshi pýly BJZQ aqshasynan qarjylandyrylǵan bolyp shyqty.

Bul málimettiń anyq-qanyǵyn Baıbazarovtyń jaqsy bilý sebebi – ol kisi buǵan deıin atalǵan taýarlardy satyp alýdy júzege asyrǵan «Báıterek» holdıńiniń tizginin ustaǵan.

Mınıstr bir júk vagonynyń quny shamamen 30-35 mln teńge, al jolaýshylar vagonynyń quny shamamen 700-800 mln teńge ekenin atap kórsetti.

«Iá, naryqtaǵy baǵa osyndaı. Sondyqtan qarjy bólindi, bul da azamattarǵa kórsetilgen kómek, biz jańa vagondarǵa minetin bolamyz, júk vagondaryn da satyp alamyz. Eger jańasyn satyp almasaq, bul naryqqa bótender kelip alady», deıdi ol.

Mınıstr bul elimizdiń vagondar parkin,  júk jáne jolaýshylar vagondaryn jańartý bolyp tabylatynyn da naqtylaı ketti.

"Qarjy ıgerilip, vagondardy jetkizý jumystary júrgizilip jatyr. Ózge de jobalar aıqyndalyp qoıdy. Ol jaǵyn naqty aıta almaımyn. Biraq Úkimet negizgi baǵyttardy bekitti: bul - ınfraqurylymdar, qaıta óńdeý óndirisi sektoryndaǵy jobalar», dedi Baıbazarov.

Mınıstr BJZQ qarjysy salynatyn jobalar qataryna energetıka salasy enbegenin de aıtady.  

«Naqty jobalarǵa keletin bolsaq, «Báıterek» qory, onyń enshiles qurylymdary, QDB, ónerkásipti damytý qory, olar árbir jobany qabyldaıdy, zertteıdi, saraptamadan ótkizip, maquldanǵannan keıin ǵana BJZQ-dan qarajat tartý úshin Ulttyq bankke júginedi», dedi mınıstr.