Depýtat Májiliste 2024 jyly 15 aqpannan bastap "Otbasy banki" keńinen qoldanysqa ıe aralyq zaım sharttaryn ózgertkenin eske saldy, dep habarlaıdy Qamshy.kz.

"Bank muny el azamattaryn aqsha jınaýǵa, onda da saýatty únemge yntalandyrý úshin jasalǵanyn atap ótti. Bul arada tutynýshy páter qunynyń 50%-yn birden aýdarsa da (depozıttegi jınaǵy bolsa da) nesıeniń jyldyq syıaqy mólsherlemesi bútin páter qunyna, ıaǵnı 100 paıyz somaǵa esepteletindeı nesıe sharttary jasalǵan. Sondyqtan bul arada mynandaı zańdy saýal týyndaıdy: el azamattaryna óz aqshasyn qaryzǵa, onda da ústine paıyz qosyp berý, sondaı-aq páter baǵasyna bútindeı bank komısıasyn ilý qanshalyqty ádiletti", deıdi ol premer-mınıstr atyna joldaǵan depýtattyq saýalynda.

Árıne, bank salymshylary buǵan narazy. Biraq bankten bul rette naqty jaýap joq, tek tutynýshy aldyn ala tólegen soma zaımǵa kepil retinde depozıtte jatatynyn aıtyp, sóz buıdaǵa salady. 

"Bul qarjylyq aıla-sharǵy, árıne. Biz ony solaı dep sanamaımyz. Biz nesıe sharttary boıynsha depozıtke taǵaıyndalatyn jyldyq paıyzdyq mólsherleme kólemi nebári 2%-dy quraıtynyn kórip otyrmyz, al memlekettik syılyqaqy 200 aılyq eseptik kórsetkishten aspaıtyn shekteýli somaǵa ǵana esepteledi (200 AEK- 738 400 teńge). Degenmen 2023 jyly Qazaqstandaǵy iri bankter arasynda menshikti kapıtaldan túsken paıda úlesiniń artýy boıynsha "Otbasy banki" kósh bastap turǵany belgili. Ósim 87,9% nemese 107,5 mıllıard teńgeni quraıdy. Biraq, bul ósim qarapaıym salymshylardyń jaǵdaıyna esh áseri joq", dep túsindirdi depýtat. 

Ol tutynýshylardyń tómen stavkada depozıtte jınaǵan aqshasynan banktiń mıllıardtap tabys taýyp, ony óz qalaýyna qaraı  paıdalanýy ádiletsizdik dep sanaıdy. Bul – taza monopolıa.

Depýtat depozıt jáne ıpotekalyq zaemǵa qatysty ádil básekelestik ornatý úshin ekinshi deńgeıli bankterge turǵynúı jınaǵy boıynsha lısenzıa berý múmkindigin qarastyrýdy usynady.